Theo Hernandez ka thënë se Franca nuk ka frikë nga Lionel Messi përpara finales së Kupës së Botës të dielën. Hernandez shënoi të parin nga dy golat e Francës në fitoren e tyre në gjysmëfinale ndaj Marokut.
Kundërshtarët e tyre në finale, Argjentina, janë udhëhequr në turne nga Messi, i cili ka shënuar pesë gola dhe ka dhënë tre asiste në gjashtë ndeshjet e luajtura në Katar.
Pavarësisht rekordit mahnitës të Messi-t dhe reputacionit të tij, Hernandez ka thënë se ai dhe shokët e tij të kombëtares franceze nuk kanë frikë nga ylli i PSG-së.
Mbrojtësi i majtë foli për stacionin italian RAI Sport për besimin e ekipit të tij. Ai tha: “Të luash dy finale radhazi të Kupës së Botës është një moment i jashtëzakonshëm. Bëmë një punë të mirë, ishte e vështirë, por jemi në finale, do të punojmë shumë për ta fituar këtë finale.
“Tani duhet të mendojmë për finalen. Jam i lodhur, por është mirë të fitosh një gjysmëfinale të Kupës së Botës. Tani le të rikuperojmë forcat për të dielën. Messi nuk na tremb, Argjentina është një ekip i jashtëzakonshëm, por ne kemi disa ditë për të punuar”.
Franca i dha fund ecurisë madhështore të Marokut që e pa skuadrën të bëhej kombi i parë afrikan në histori që arrin në një gjysmëfinale të Kupës së Botës. Luanët e Atlasit luftuan për 90 minutat e plota, por talenti i francezëve në fund mbizotëroi.
Les Bleus do të përballet me skuadrën argjentinase të dielën në stadiumin Lusail Iconic. Argjentina pati një fillim të dobët të turneut, duke humbur ndaj Arabisë Saudite, por ka ndryshuar marsh në ndeshjet pasuese dhe ka arritur në finale.
Amerikano-jugorët rezervuan vendin e tyre në ndeshjen më të madhe të futbollit pasi mposhtën Kroacinë e Luka Modric me një fitore 3-0. Ndeshja do të vërë ballë për ballë Messi-n me Kylian Mbappe. Të dy janë shokë skuadre te Paris Saint Germain, por do të duhet të sfidohen në Katar për të fituar trofeun më të rëndësishëm.
