Një 41-vjeçar është arrestuar nga policia e Tiranës pasi përndiqte ish-bashkëshorten pas divorcit.
Sipas njoftimit të uniformave blu, ka rënë në pranga shtetasi me iniciale A.M, i cili ka ushtruar dhunë psikologjike ndaj saj dhe e ka kanosur përmes telefonit.
Ndërkohë një grabitje ka ndodhur këtë të enjte në një biznes në rrugën “Vaso Pasha”. Pronari i saj ka bërë kallëzim në polici dhe blutë kanë nisur punën për kapjen e autorëve.
“Specialistët për Hetimin e Krimeve të Komisariatit të Policisë Nr. 4 arrestuan shtetasin A. M., 41 vjeç, për veprat penale “Dhuna në familje” dhe “Kanosja”, pasi ka ushtruar dhunë psikologjike ndaj ish-bashkëshortes dhe e ka kanosur atë nëpërmjet telefonit.
Në Komisariatin e Policisë Nr. 2 është paraqitur shtetasi A. S., 36 vjeç, i cili ka kallëzuar se në rrugën “Vaso Pasha”, në biznesin që administron, i kanë vjedhur një shumë të papërcaktuar parash. Punohet për identifikimin dhe kapjen e autorëve”, thuhet në njoftimin e policisë.
Materialet i kaluan Prokurorisë, për veprime të mëtejshme procedurale.
