Kreu i Partisë së Lirisë, Ilir Meta ka komentuar edhe një herë situatën e tensionuar në veri të Kosovës.
Gjatë një prononcimi për mediat, Meta theksoi se burimi i tensionit vjen nga politika e vjetër e Beogradit e cila sipas tij kërkon të përshkallëzojë konfliktin në rajon. Gjithashtu Meta shprehu mbështetje të hapur ndaj institucioneve të Kosovës dhe u bëri thirrje palëve për dialog.
“Është e qartë se burimi i tensioneve vjen nga politika e vjetër e Beogradit, kërkon të krijojë tensione në rajonin tonë. Kjo nuk shkon në interes të askujt më shumë se Rusisë. Tregon se kush është faktori që minon vlerat e bashkëjetesës, në vendin tonë. Ne e kemi mbështetur dhe mbështesim institucionet e Kosovës, KFOR dhe apelojmë për dialogun si të vetmen rrugë jo vetëm të normalizimit por dhe për të ecur përpara drejt normalizimit të plotë të marrëdhënieve Serbi-Kosovë”, tha Meta.
