Media belge “Le Soir” ka publikuar pamje të operacionit “Qatar-Gate” që çoi në zbulimin e një mega-skandali korruptiv në Parlamentin Europian, ku protagonistë janë ish-eurodeputeti Antonio Panzeri dhe zv/Presidentja e këtij institucioni, anëtarja greke e PASOK, EVa Kaili.
Sipas provave dhe materialeve fotografike më shumë se 1.5 milionë euro para cash u zbuluan në shtëpinë e ish-deputetit italian Pier Antonio Panzeri dhe eurodeputetes greke Eva Kaili.
Gjatë kontrollit në shtëpinë e Panzerit në Bruksel, hetuesit e policisë gjyqësore federale kishin zbuluar rreth 600 mijë euro.
Duke shtuar paratë e gjetura babait të Kailit dhe në shtëpinë e kësaj të fundit dhe partnerit të saj Francesco Giorgi në Bruksel, shuma e sekuestruar shkon në më shumë se 1.5 milionë euro.
Babai i Kailis është arrestuar nga hetuesit në hotelin Sofitel në Bruksel, duke pasur në posedim një valixhe plot me para.
Ky zhvillim i lejoi hetuesit të kontrollonin shtëpinë e eurodeputetes Kaili pa kërkuar heqjen e imunitetit për të. Në atë banesë u gjetën dhe sekuestruan sende me vlerë, që besohet se i ishin dhënë nga zyrtarët e Katarit, së bashku me çanta të tjera me para.
“Panzeri, Kaili dhe Giorgi u akuzuan dhe mbi ta rëndon një urdhër arresti që u lëshua nga hetuesi Michel Clez”, njoftoi të dielën zyra e prokurorit federal.
