Gazetari Klodian Tomorri, thotë se afera e inceneratorëve ka filluar që në gjenezë kur u konceptua gjithë skema, duke nënvizuar se u ndryshua strategjia kombëtare për menaxhimin e mbetjeve, pasi në strategji ishte përcaktuar dhe hierarkia, parandalimi, trajtimi dhe incenerimi ishte i fundit.
Nga studio e MCN Economy, Tomorri deklaroi se strategjia u ndryshua për t’i hapur rrugë ndërtimit të inceneratorëve.
Sipas tij, gjithçka nisi në Elbasan ku u shpall gjendja e jashtëzakonshme e mjedisit dhe qeveria bënte propagandë ku shfaqte malet me plehra për të justifikuar atë që do vinte më pas.
“U hap procedura për koncensionin e inceneratorit të Elbasanit, me procedurë të paligjshme, pasi nuk u bë me tender, por me negociim paraprak të kontratës.
Kjo është një nga shkeljet që ka konstatuar SPAK dhe janë ngritur akuza për zyrtarët e përfshirë me skemë. Vazhdoi në formë piramide më tej me Fierin dhe Tiranën.
Nëse Elbasani me Fieri paguheshin nga buxheti, në Tiranë nuk ka pagesë nga buxheti, por do e bënte privati dhe Bashkia Tiranë do paguante 29 euro për çdo ton mbetje që depoziton në landfillin e Sharrës.
Tarifa 29 euro parashikonte depozitimin dhe incenerimin e mbetjeve, por ne sot nuk kemi incenerator në Tiranë, ndërkohë që paguhet 29 euro ndërkohë që më parë depozitimi i mbetjeve në Sharrë ka qenë pa asnjë lekë”.
Tomorri shtoi më tej se projektvendimi i qeverisë për t’i dhënë bonusin me 8 pikë kompanisë që kishte paraqitur kërkesën për të ndërtuar incenerator në Tiranë, në projektvendim shkruhej se ishte “Integrated Enetgy sh.p.k”.
Gazetari sqaroi se kompania nëse ka prapashtesën “sh.p.k” është e regjistruar në Shqipëri, por se mbasi mori projektvendimin ministrja e Shtetit, Ermonela Felaj shkoi të bënte kërkime se kush ishte kompania.
“Pasi kërkoi në Qendrën Kombëtare të Regjistrimit bën dhe shkëmbim shkresash dhe del se nuk rezultonte kompani me emrin Integrated Energy s.hp.k.
Felaj i kthen përgjigje me shkresë qeverisë ku bënte pjesë, se ne kemi kërkuar për kompaninë në projektvendim dhe nuk rezulton që ekziston.
Për t’i dhënë 8% të pikëve, kompania është regjistruar 7-8 muaj më vonë mbas vendimit të qeverisë që i dha bonus. Kjo është një katrahurë aq e madhe sa ka përfshirë gjithë shtetin dhe qeverinë.
Ajo që po ndodh me inceneratorët në Shqipëri, është ajo që ndodh me organizatat mafioze ku kërcet sherri për ndarjen e plaçkave të luftës. Kjo është ajo që po ndodh me inceneratorët.
Kohët e fundit ka shantazhe dhe luftë të brendshme me aktorët kryesorë në këtë histori se procesi i ndarjes së plaçkës ka krijuar pakënaqësi dhe sherre.
Tani që afera ka shpërthyer, po kërkohet të bëhet dikush kurban. Vendime të tilla kalojnë në qeveri, kanë një proces dhe rregullore që përcakton shkallët se si kalon një vendim qeverie.
Bëhet propozimi nga ministria e linjës shkon në sekretarinë e përgjithshme të Kryeministrisë, ku verifikohet akti nëse ka kundërshti, e kthen mbas për rregullim.
Nëse akti është në rregull dhe korrekt me ligjin, kalon në mbledhje qeverie për votim.
Kjo është katrahurë aq e madhe sa nëse inceneratorët do hetoheshin tamam në Shqipëri nuk do kishte më shtet, e gjithë klika do paralizohej se është një aferë që ka përfshirë gjithë hierarkinë e qeverisë.
Koka dhe Bllako kanë qenë personazhe në këtë histori dhe them me siguri që nuk kanë qenë ata truri i organizimit të skemës së inceneratorëve dhe hallkat më të rëndësishme në procesin e vendimmarrjes dhe realizimit të icneneratorëve”.
Tomorri tha gjithashtu se Engjëll Agaçi flet për Kryeministrinë ndërsa SPAK për procedurën e prokurimit.
Ai shtoi se ndonëse Agaçi deklaroi se Ministria e Mjedisit ndoqi procedurat, Tomorri deklaroi se ministria është pjesë e qeverisë dhe fakti që ka akuzë zyrtare se për Elbasanin nuk u ndoqën procedurat, por se procedura e ndjekur ishte e paligjshme.
