Kokfortësia e Aleksandër Vuçiç për të mos i aplikuar sankisonet që Bashkimi Europian ka vendosur përkundrejt Rusisë pritet të ketë pasoja vërtetë të rënda për Beogradin zyrtar.
Sipas mediumit holandez “NOS”, në Amsterdam janë bërë qeveria e parë e unionit që zyrtarisht i kërkon Bashkimit Europian që KE t’i ndërpresë negociatat për anëtarësim me Serbinë.
Sikur të mos mjaftonte kjo politikanët në Holandë po kërkojnë që të pezullohet edhe udhëtimi pa viza i serbëve në zonën Schengen nëse Beogradi vazhdon ta ndjekë kursin e tij duke mos i vënë sanksione Rusisë.
Sipas “NOS” – VVD dhe PvdA, dy partitë politike në Amsterdam duan që në Bruksel të propozohet një procedurë e re e pranimit të kandidatëve për anëtarësim në BE.
“Serbia është kandidate për anëtarësim në Bashkim Europian dhe për këtë arsye merr miliarda euro ndihmë”, ka shkruar deputeti i VVD-së, Van Wijngaarden.
Në një mocion që ai do ta paraqesë sot bashkë me PvdA-në, palët shkruajnë se Komisioni Europian duhet të jetë në gjendje të trajtojë ndryshe kandidatët për anëtarësim që nuk përshtaten me politikën e jashtme të Brukselit.
“Serbia dëshiron të mbetet në krah të Rusisë dhe në të njëjtën kohë të bëhet anëtare e BE-së. Me fjalë të tjera të hajë në të dy krahët”, tha anëtari i VVD-së.
“Përveç kësaj, ata duan ta mbajnë udhëtimin pa viza, por vendi gjithashtu vepron si një port tranziti për migrantët e paligjshëm. Nëse qeveria serbe vazhdon ta ndjekë këtë kurs, si procesi i anëtarësimit në BE ashtu edhe udhëtimi pa viza për serbët duhet të pezullohet”, shton ai më tej.
Ndërkohë, sipas deputetit të PvdA, Piri, politika e jashtme e përbashkët është një “reflektim i vlerave mbi të cilat është themeluar BE-ja: promovimi i demokracisë, shtetit të së drejtës dhe të drejtave të njeriut”.
“Nëse një vend kandidat ka probleme me këto parime bazë është vetëm logjike të nxirren pasoja”, thekson ai.
