Pasditen e sotme Ministria e Jashtme konfirmoi se kanë nisur procedurat për zëvendësimin e ambasadores së SHBA Yuri Kim, pasi mandati i saj 3 vjeçar që nisi më 20 janar të 2020 është drejt përfundimit.
Teksa Departamenti Amerikan i Shtetit ka nisur procedurat e zëvendësimit, të gjithë janë kurioz të mësojnë diplomatin të cilit Presidenti Joe Biden do t’i delegojë detyrat e rëndësishme për drejtimin e selisë diplomatike në Tiranë.
Sipas TCH besohet që zëvendësi ambasadores Kim mund të jetë David Kostelanick.
Ky i fundit është një njohës i mirë i çështjeve ruse dhe për momentin është drejtor në Zyrën për Europën Qendrore dhe Jugore në Departamentin Amerikan të Shtetit.
Ardhja e ambasadorit të ri konfirmohet nga një mesazh publikuar në Tëitter prej Ministrisë së Punëve të Jashtme ku thuhet se “për të shmangur çdo spekulim mbi “heshtjen” e MEPJ, konfirmojmë se procedura e zëvendësimit të ambasadores Kim ka nisur zyrtarisht.
Ndërkohë kjo ministri thekson që për emrin e ambasadorit të ri procedura nuk na mundëson të bëjmë komente.
Fillimisht është DASH që i dërgon emrin për pëlqim Ministrisë së Punëve të jashtme dhe pasi të jetë dakordësuar emri propozuar nominohet për postin e ambasadorit nga Presidenti SHBA.
Kandidatura e nominuar më pas duhet të paraqitet në senat nga ku zhvillohet një dëgjesë e më pas është senati që e miraton.
