Deklaratave të Yuri Kim tre ditë më parë për Zërin e Amerikës, ku i dërgoi një mesazh të prerë Sali Berishës duke thënë se “non gratat” nuk duhet të përzihen me zgjedhjet, duke ndërhyrë kështu hapur në fushatën për 14 Majin, kreu i PD i është përgjigjur në konferencën e sotme për shtyp.
Diplomatja amerikane u kujdes që mesazhi të ishte i drejtpërdrejtë kur tha se “kur ata që janë përcaktuar nga Shtetet e Bashkuara të Amerikës për korrupsion domethënës, pretendojnë që do të largojnë korrupsionin, është njësoj si zjarrvënësi i fshatit që premton se do shuajë të gjitha zjarret”.
Etiketimin si “zjarrvënës”, Berisha e analizoi sot duke i kujtuar Kim përpjekjet e saj për të asgjësuar PD-në, sipas tij në bashkëpunim me Ramën dhe Bashën.
“Ajo që mund të them unë është se përpjekjet e guvernatores për asgjesimin e PD-së. Për emërimin në krye të kësaj partie, ekspoentët të lidhur në palcë me krimin nuk janë asgjë tjetër veçse dëshmi se kjo ka funksionuar si anëtare e ekipit të McGonigal me fustan. Kjo ka përdorur pushtetin që i jep përfaqësimi i SHBA si ambasadore kundër opozitës demokratike të një vendi anëtar të NATO-s. Nuk po them asnjë të re se i kam thënë të gjitha”, u shpreh Berisha.
Në vijim lideri i opozitës i kujtoi Kim se ndërhyrja në fushatë është krim dhe kërkoi një reagim nga KQZ për këto deklarata të ambasadores.
“Deklaratës së fundit i kam dhënë përgjigje. Gjykova se ishte e nevojshme por tani kam vetëm një shtesë, njerëzit që përdorin gjuhë me zjarre me kështu ata kanë probleme me veten e tyre. Pra një fjalor i tillë është për njerëz në ethe kur të kapin ethe të forta. Pyeta disa herë edhe Chat GPD çfarë do të thotë ky fjalor dhe më dhanë këtë përgjigje, se unë jam edhe mjek, po prapë të thashë se të bëj një check up. PD po ecën e sigurtë në fitore. E paralajmëroj se ndërhyrja në fushatë elektorale është krim, nuk duhe të ndërhyrë. Unë e kuptoj që mund të dalë ndonjë deklaratë nga KQZ që është nuk është por për mua është fushatë”, nënvizoi ai.
