Sekretarja për marrëdhëniet me Publikun në PD, Jola Hysaj, e ka quajtur provokim dhunimin me grushte ndaj kreut të PD Sali Berisha, gjatë protestës së 6 dhjetorit, pasi sipas saj synimi ishte të shkaktohej rrëmujë.
Duke folur për ‘News24’, ajo ka treguar se pavarësisht sulmit, kreu i PD u ka kërkuar truprojave që ta linin agresorin, pasi sipas tij ishte thjesht një fatkeq.
“Kam qenë shumë pranë zotit Berisha në atë moment dhe ishte e papritur. Në protesta ka gjithmonë qytetarë që i afrohen Berishës për ta takuar dhe askush nuk i shkonte në mendje se do të kishim një atentat politik të tillë, por nga zoti Rama është gjithçka e pritshme. Që vetë doktori i cili për agresorin i bënte thirrje truprojave, ‘ju lutem lëreni mjeranin se nuk e bën ai’. Nuk mund të themi se kjo gjë ndodhi rastësisht. Kemi të bëjmë me një mesazh të pastër politik. Filloi me Agon Chanel, me Ora-n dhe tritol në “Prestige Resort”. Me qetësi mesazhi Berishës ishte se do të ecim përpara”, tha ajo.
Zyrtarja e PD, po ashtu tregoi se ishte rreth një metër larg kreut të PD, në momentin kur u godit me grusht, duke u shprehur se ka mbetur e shokuar.
“Pashë dorën e këtij zotërisë kundrejt zotit Berisha. Askush nuk e priste diçka të tillë. E çuditshme ishte se arriti të depërtonte. Berisha takon çdo qytetar dhe ka menduar se po afrohet një qytetar për ta takuar. Jo vetëm që jemi trembur, por nuk kuptonim se si do të merrte situata. Ishte provokim për të pasur rrëmuja dhe për ta agravuar situatën. Por Berisha si lider që është gjeti forcë edhe të merakosej për agresorin. Turma ishte e revoltuar dhe shokuar dhe nuk e dimë se si mund të kishte reaguar sepse edhe policia ishte pranë, pra nuk e kanë parë se si një njeri i sëmurë të ishte aq pranë…Rama gjatë samitit tentoi ta shmangte një përgjigje”, tha ndër të tjera ajo.
Sipas saj, frika më e madhe ishte agravimi i situatës pasi turma mësoi se Berisha u godit. Ajo hodhi dyshime se si policia që ishte fare pranë nuk e pengoi agresorin.
Sa larg ishte Berisha?
Një metër. Çdo gjë ishte para syve tanë. Jam shokuar në atë moment sepse ishte e papritur. Çdo gjë ishte kundër një organizimi shumë miqësor dhe i një proteste shumë normale dhe paqësore. Askush nuk e priste se do të ndodhte diçka e tillë.
Çfarë patë ju?
Ishte dora e këtij zotërisë kundër Berishës. Nga një ecje normale u kthye në një shpërfytyrim i secilit prej nesh në atë momente. Askush nuk e priste. Para Berishës qëndrojnë gjithmonë mediat.
Ky person arriti të depërtonte…
Kjo ishte më e çuditshmja se askush nuk e priste. Berisha ka menduar që po i afrohej një qytetar që do ta takonte.
U trembët?
Jo vetëm që u trembëm por nuk e dinim si do të vazhdonte situata. Ishte provokim i qartë për të pasur rrëmujë dhe për të agravuar situatën. Turma ishte shumë e revoltuar dhe nuk e dinim si do të reagonte turma ndaj policisë e cila ishte vetëm disa hapa larg nesh. Nuk e paskan parë këta që ishte një i “sëmurë” siç thuhet?
Çfarë informacionesh iu kanë ardhur sot?
Ky sulm ishte i parapërgatitur. Goditja aq precize me të majtën do të thotë që e ka parë në detaje të gjithë lëvizjen që është bërë. Në deklaratën e tij tha “bëra atë që duhet të bëja”. Jetojmë në një shoqëri ku mesazhet dita ditës po vijnë gjithmonë edhe më të forta.
Cfarë iu tha Berisha?
Fjalët e para ishin “mos e godisni më mjeranin”. Me ne nuk tha asnjë fjalë, eci përpara.
Kush ia dha ndihmën e parë?
Ia dha stafi i tij. Ne nuk e dinim si të reagonim. Mesazhi i tij ishte të ecim përpara, pavarësisht çfarë pengese që na del.
Thatë që ishte shumë pranë irritimit të turmës, por më pas u shmang. E udhëhoqi Berisha qetësimin e situatës?
Qetësimi i situatës erdhi nga ne që ishim rreth tij. Nuk ishte qëllimi jonë që të agravohej situata. Mesazhet që vijnë nga ajo ngjarje për ne lënë shije të hidhur sepse ishte mesazh për këdo nga ne që ishim prezentë aty. Ky mesazh ishte bumerang për Qeverinë. Qytetarët nuk duhet të qëndrojnë pasivë.
