Kryeministri Edi Rama, ka rënë në kontraditë me fjalët e veta, sa i takon ndeshjes së Botërorit Serbi-Zvicër e cila u finalizua me fitoren e kësaj të fundit.
Ndeshja ndezi debate dhe diskutime të shumta në rrjet, pas veprimit të dy lojtarëve me origjinë shqiptare nga Kosova (Xherdan Shaqiri dhe Granit Xhaka), të cilët i festuan golat e tyre me “Shqiponjën dykrenare”, simbol i përkatësisë etnike shqiptare.
I pyetur nga gazetarët në një dalje për mediat, pse nuk ka reaguar mbi këtë veprim të futbollistëve, kryeminsitri Rama, tha ndër të tjera, se nuk do donte që këta futbollistë të përdoreshin politikisht, apo mish për top për një lojë luftrash ballkanike.
“Nuk kuptoj realisht pse duhet të flisja. Unë nuk jam kryeministër i Zvicrës, jam kryeministri i Shqipërisë dhe nëse do të ndaja nga skuadra e Zvicrës dy qytetarë zviceranë që kanë kombësi shqiptare, që janë shqiptarë të cilët ne i shohim me dashuri dhe padiskutim simpati të madhe të gjithë, për një ndeshje të veçantë, çfarë do bëja? Konkretisht, çfarë do bëja? Do t’i përdorja ato dy figura për politikë dhe në një mënyrë aspak dinjitoze për hir të së vërtetës sepse është ekipi kombëtar i një shteti tjetër dhe do t’i fryja zjarrit të një nacionalizmi, më falni për shprehjen, qesharak, por nacionalizmi është gjithmonë sa qesharak, aq edhe i rrezikshëm. S’është i nevojshëm, nuk e shoh fare të nevojshme. Kush e bën këtë nuk bën gjënë e duhur.
Kështu që faleminderit për pyetjen meqë m’u dha mundësia sepse e kam dëgjuar si koment dhe është për të ardhur keq si mund të shkëputem nga skuadra e tyre dy lojtarë që janë qytetarë të denjë dhe të nderuar të atij shteti dhe për atë arsye luajnë me atë skuadër, për shkak të kombësisë së tyre të përdoren si mish për top për një lojë luftash ballkanike, është një… për sa i përket pastaj çështjes së sanksioneve, ato janë pastaj çështje që lidhen me politikën e FIFA-s e cila, ju e dini shumë mirë, ne e dimë shumë mirë, është një politikë tejet strikte për moscenimin e kuadrit në aspektin politik në asnjë lloj nuance e cila ka ose mund t’i jepen natyrë politike. Këtu mund të kemi ne mendime të ndryshme nga FIFA, por FIFA është qeveria e futbollit, nuk është as qeveria e Shqipërisë, as mediat shqiptare, as… kështu që janë rregullat të cilat kush merret me futboll i ka pranuar dhe duhet t’i zbatojë, kaq”, tha Rama.
Por menjëherë pas kësaj deklarate në rrjet është publikuar një foto e postimit të Ramës në vitin 2018-të, ku ai shprehte krenarinë për Xhakën dhe Shaqirin të cilët kishin shënuar po kundër Serbisë në botërorin Rusia 2018.
“Foto e ditës” – kishte shkruar ai, me dy figura duke qeshur duke postuar foto ku dukeshin Xhaka e Shaqiri duke bërë shqiponjën me duar. Të dy lojtarët kishin shënuar gola në atë mbrëmje që kishte përfunduar 2-1 për Zvicrën.
Teksa në rrjet plasi gallata dhe talljet me këtë hipokrizi banale, Rama u detyrua të bëjë një reagim të dytë në rrjetet sociale, ku shkruan :“Janë ca kinse patriotë më të mëdhenj se të tjerët e disa kinse të zgjuar më shumë se të tjerët, që fjalëve të mia sot u kundërvihen me postimet e mia dikur për fitoren e Xherdanit e Granitit! U qëndroj 100% të dyjave dhe ata që nuk duan ta kuptojnë psenë nuk kam se si ndihmoj” .
Mesaduket kryeministri nuk është i vetëdijshëm në veprimet që bën, ose vuan nga memoria afatshkurtër.
Megjithatë pas këtij postimi dhe atij për suksesin e investimit të Alabarit në Zagreb, mirë do ishte që Kryeministri ta kalonte menaxhimin e rrjeteve të veta sociale në duar profesionistësh dhe mos i mbante ato peng të impulseve të veta të pakontrolluara.
