Nga Boldnews.al
Territori i Portit të Durrësit mund të konsiderohet “skemë krimi”. Tenderët e njëpasnjëshëm për mirëmbajtje, vendosje sinjalistike, pastrimi apo edhe sheshimi, iu kanë kushtuar shqiptarëve dhjetëra miliona euro. Të gjitha këto procedura të dyshimta janë realizuar në 6 mujorin e fundit, në të njëjtën kohë që Ministria e Infrastrukturës po negocionte me arabët për t’iu dhënë territorin për ndërtime. Ndërkohë, nga ana tjetër, drejtori i Autoritetit Portual të Durrësit, Pirro Vengu, vijonte i qetë procedurat me shumë zero, duke bërë edhe rolin e të paditurit.
Pavarësisht se eprorja e tij direkte, Belinda Balluku, ishte personi kryesor që negocioi, madje duke ngrënë dreka apo darka në Dubai. Disa muaj më parë, BoldNews.al denoncoi në vijimësi procedurat e Vengut, i cili do të shpenzonte plot 1.3 milionë euro për zgjerimin dhe sheshimin e disa pjesëve. Por, disa ditë më parë, në fund të muajit nëntor 2022, Vengu e ka anuluar këtë tender. Kush ia tërhoqi veshin?!
Sipas dokumenteve që disponon BoldNews.al, Autoriteti Portual i Durrësit, ka shpallur në Agjencinë e Prokurimit Publik njoftimin për anulimin e tenderit për zgjerimin e portit. Bëhet fjalë për procedurën me numër reference REF – 35927-07-08-2022, ndërsa ka si objekt “projektim, zbatim – pastrim – rehabilitim i shesheve tranzitore”. Fondi për këtë tender ishte 138.800.000 lekë pa TVSH, ose me TVSH rreth 1.3 milionë euro.
“Arsyet e anulimit janë bazuar në ligjin ‘për prokurimin publik’, për shkak të rrethanave të paparashikueshme dhe objektive, nevojat ose aftësia paguese e
autoritetit ose entit kontraktor kanë ndryshuar” thuhet në këtë dokument, i cili është shpallur në datën 24 nëntor 2022.
Në muajin korrik 2022, BoldNews.al denoncoi këtë tender, i cili po bëhej në të njëjtën kohë me procedurat “2 miliard euro”. “BoldNews.al ka siguruar disa dokumente të vetë Portit të Durrësit, i cili po shpenzon miliona euro, kësaj here për të zgjeruar portin aktual! Dy janë mundësitë, ose këto para’ do të shkojnë te firma të caktuara dhe puna nuk do bëhet, ose arabët janë larguar nga ky projekt! Në dokumente, Vengu ka shkruar se afati për zbatimin e tenderit është 7 muaj nga data e njoftimit të fillimit të punimeve” denoncuam në atë kohë.
Madje, hulumtuam dokumentet shoqëruese, ku paradoksalisht Vengu shkruante se “parashikohet që investimi të kenë impakt pozitiv në logjistikën brenda territorit portual dhe në të ardhurat ekonomike të Autoritetit”. Vengu shkruante se “projekti do të parashikojë që sheshit do ti shtohet një sipërfaqe pak më e madhe se 9,000 m2. Kjo sipërfaqe e re, duke u integruar në parkimin ekzistues TIR do të bëjë që ky parkim të përdoret jo vetëm si parkim afatgjatë për kamionë por edhe për pakim ditor” shkruan Vengu, madje “afatgjatatë”. Dhe, gjatësia ishte vetëm disa muaj, pasi i “shkulën” veshin dhe ai e anuloi.
