Nga Boldnews.al
Je trafikant droge, trafikant vajzash për t’i shfrytëzuar në prostitucion, grabitës i dhunshëm, hajdut vilash luksoze jashtë vendit? Karrierën e ka përpara dhe e pret një post i rëndësishëm, nga deputet, kryetar bashkie, drejtor drejtorie dhe nëpunës i lartë në administratën shtetërore. Në dhjetë vitet e fundit kjo ka qenë motoja e kreut të qeverisë. I ka dalë për mbarë sepse personazhe të tillë, jo vetëm e mbajnë dhe ndajnë pushtet, por kanë gjunjëzuar qytetarët deri në adhurimin e të keqes.
Rasti më i fundit është në Frakull të Madhe të Fierit, ku ish-kryetari socialist i komunës Viktor Cervenaku dhe aktualisht drejtor në OSHEE, u arrestuar si organizator i trafikimit të 430 kilogramë kokaine të ardhur nga Kolumbia. Me këtë rast po merret drejtësia, që pasi ia rrasën me “zor” dosjen me fakte të mbledhura nga DEA amerikane, në fund lëshuan urdhër-arrestet për të mos e bërë mullarin e abuzimit që mban erë edhe më të madh ngase është.
Por çudia është tjetër vend dhe po kthehet në fenomen masiv. Banorët e zonës ku Cervenaku ushtroi detyrën e “kryepashait” lokal shprehen me admirim për të. “Na ka ndihmuar, ka bërë shumë për fshatin, është i pafajshëm, ta lirojnë”– shprehen thuajse të gjithë. Njerëz të varfër, me shumë halle, me mohim të çdo të drejte, me patronazhistë nga pas si hije të vetes janë kthyer tashmë një hap larg “Sindromit të Stokholmit”, ku pengu adhuron pengmarrësin, aq sa bien ë dashuri me të dhe sjelljen e tij.
Nuk është vetëm Frakulla e Fierit që vuan nga kapadaitë lokal të “fortët fizikisht” dhe të fortët me pushtet politik dhe publik. Kudo në çdo cep të vendit personazhe të tillë, ish-deputetë, dhe kryebashkiakë, të larguar për shkak të ligjit të dekriminalizimit, nën akuzën e vrasjeve, trafikut të drogës, apo shfrytëzimit të prostitucionit në rrethana rënduese, pavarësisht se janë larguar “de jure” nga pushteti, sërish ata kanë de fakto pushtet.
Kudo respektohen, herë nga frika e herë nga dhurimi se një herë dikur ndonjërit mund ti ketë dhënë para sa për të blerë dy muaj bokë dhe ushqime. Një tjetër e ka future në punë diku në shtet dhe I është mirënjohës sepse me atë rrogë mban frymën e fëmijëve. Të tjerë kanë zgjudhur një hall diku në spital ku është dashurur një telefonatë e tyre që të injektohet qoftë edhe një qetësues.
Të gjitha këto, duke shfrytëzuar varfërinë, interesin dhe hallin e çdo familje që vetë është e ndershme, por detyrohet të respektojë të pandershmin e pushtetshëm.
Nëpër zonat lokale i përmendin si heroj, ata që janë majmur në korrupsion, ata që kontrollojnë trafiqet, ata që ndërhyjnë për të marrë dhe tjetërsuar prona. Burgaxhiu i vendeve të BE-së u kthyer si zyrtar i lartë në kohën e Ramës. Po shitet si vlerë puna e trafikantit të drogës që ka ndikim kudo në pushtet dhe mban të nënshtruar një popull të varfër që detyrohet të largojë fëmijën jashtë vendit me kamionë e gomone për ti thurur lavde, pashait lokal që vjedh, grabit pronën publikë, rrëmben taksat edhe atij të varfërit duke u marrë në fillim dinjitetin dhe më pas votën sa herë të duan.
Nuk janë pak por 157 raste ku deputetë, kryetarë bashkishë, drejtorë drejtorishë dhe anëtarë të këshillave bashkiakë apo komunalë nga radhët e Rilindjes që janë dënuar jashtë vendit për krime të rënda por këtu kryeministri I shfrytëzon dhe e shfrytëzojnë për të grabitur pushtet dhe më pas grabitur pronën e taksat publike. Nëse do ishte vetëm “vlerë materiale” e grabitur prej tyre do ishte një e keqe shumë e vogël në krahasim me “grabitjen e mendjes” së qytetarëve të cilët adhurojnë njeriun e ri që u krijua në dhjetë vitet e fundit.
Ky është njeriu i ri që krijoi Rama në vetëm një dekadë pushtetim. Trafikanti nderohet, i korruptuari shitet si njeri me vlerë dhe grabitësi të quhet “ëngjëll” i të varfërve që janë me stomakun bosh, por edhe më shumë në mendje teksa thurin lavde dhe u janë mirënjohës pengmarrësve të tyre.
