“Evropa nuk është mjaftueshëm e fortë!”.
Kjo është kritika që ka ardhur në drejtim të unionit nga kryeministrja e Finlandës Sanna Marin, e cila u tregua ‘brutalisht e sinqertë’ për aftësitë mbrojtëse të Evropës.
“Ne nuk jemi mjaftueshëm të fortë për t’i bërë ballë Moskës. Duhet të sigurohemi që të jemi më të fortë. Do të jem brutalisht i sinqertë me ju, Evropa nuk është mjaft e fortë. Do të ishim në telashe pa Shtetet e Bashkuara. Evropa është bërë shumë e varur nga bashkëpunimi me regjimet që nuk ndajnë vlerat tona të përbashkëta“, tha ajo në një prononcim për mediat duke përdorur si shembull mbështetjen e Finlandës te energjia ruse, përpara se të kthehej te varësia te produktet kineze.
Udhëheqësi finlandez e përshkroi tregtinë me Kinën si një “realitet”, duke shtuar se “ne të gjithë kemi shqetësime kur bëhet fjalë për Kinën dhe BE duhet të sigurohet që ne të mos kemi atë lloj varësie kritike kur kemi të bëjmë me qeverinë e Xi Jinping”.
“Vartësitë tona po bëhen dobësitë tona më shpejt dhe në fusha më të rëndësishme të shoqërive tona sesa do të donim të ndodhte”, theksoi Sanna Marin.
Udhëheqësja 37-vjeçare finlandez dënoi politikat e Bashkimit Evropian që theksonin rëndësinë e angazhimit me Putinin dhe tha se blloku duhet të kishte dëgjuar vendet anëtare që ishin pjesë e Bashkimit Sovjetik përpara se ai të shpërbëhej.
Që nga anëtarësimi në Bashkimin Evropian në vitin 2004, vende të tilla si Estonia dhe Polonia u kanë kërkuar anëtarëve të BE-së që të mbajnë një qëndrim më të ashpër ndaj Putinit, një qëndrim i zbutur nga Franca, Gjermania, Italia dhe Greqia – e cila favorizonte lidhje më të ngushta ekonomike me Moskën.
Marin këmbënguli se Ukrainës duhet t’i jepet çfarëdo që duhet për të fituar luftën, duke shtuar se Shtetet e Bashkuara kanë qenë thelbësore në furnizimin e Kievit me armë, financa dhe ndihmë humanitare të nevojshme për të zbehur përparimin e Rusisë.
“Duhet të sigurohemi që po i ndërtojmë gjithashtu ato aftësi kur bëhet fjalë për mbrojtjen evropiane, industrinë evropiane të mbrojtjes dhe duke u siguruar që mund të përballemi në lloje të ndryshme situatash. Duhet të kishim dëgjuar miqtë tanë balltikë dhe polakë shumë më shpejt. Për një kohë të gjatë, Evropa po ndërtonte një strategji ndaj Rusisë për të mbyllur lidhjet tona ekonomike, për të blerë energji nga Rusia… menduam se kjo do të parandalonte një luftë”, tha Marin.
Por ajo shtoi se kjo qasje u provua të ishte krejtësisht e gabuar.
