Kreu i Partisë Demokratike Sali Berisha ka zhvilluar një takim me banorë të njësisë nr 1 dhe 3 në Tiranë. Berisha vijoi me akuzat ndaj qeverisë Rama, duke thënë se po varfëron shqiptarët teksa shtoi se jemi një komb që po pakësohemi cdo ditë e më shumë.
Gjatë fjalës së tij Berisha foli dhe për protestën që do zhvillojë opozita më 6 dhjetor.
“Ne mblidhemi në këtë takim për të diskutuar mbi dy zhvillime të rëndësishme, zhvillimi për herë të parë në këtë formë i primareve në Shqipëri dhe natyrisht nuk mund të ndodhte në një parti tjetër përveç PD-së. Problemi i dytë, po i një rëndësie të jashtëzakonshme është protesta e thirrur për popullin opozitar më datë 6 dhjetor. Në një eveniment jashtëzakonisht të rëndësishëm. Në një ditë që në Tiranë mblidhen liderë të BE-së dhe vendet e Ballkanit Perëndimor. Dalja jonë, në bulevard, mbushja e bulevardit me popull opozitar është një përshëndetje, një akt mikpritje për të gjithë përfaqësuesit e vendeve demokratike, që në 30 vite i kanë dhënë një ndihmë të jashtëzakonshme Shqipërisë”, shprehet Berisha.
Sipas tij, kjo protestë do të shërbejë për të dhënë një mesazh tek liderët europianë se si është në të vërtetë realiteti shqiptar.
“Nga ana tjetër, dalja jonë në protestë, është një detyrim, një mision për të përfaqësuar në atë protestë të gjithë të vërtetat e fshehura të realitetit shqiptar. Ky është regjimi më i urryer për shqiptarët. Regjimi i Edi Ramës. Ne dalim në shesh, për t’u provuar miqve që vijnë nga Europa, që prapa lustrës, mashtrimeve, gënjeshtrave dhe propagandës, me qindra milionë euro lobimesh, qëndron një komb që po pakësohet më shpejt se në çdo luftë dhe epidemi
Qëndron një komb, të cilin makineria shtetërore i vjedh çdo ditë buxhetin, pasuritë publike, pasi u ka vjedhur votën. I ka rrëmbyer dhe shpresën. Qëndron një komb, defakto në këtë gjendje siç është, të ardhme nuk ka. E ardhmja e tij po emigron masivisht. Po largohet më shumë. Qytetarët po varfërohen çdo ditë e më shumë, ndërsa qeveritarët pasurohen. Është shkëputur totalisht një raport që ekziston mes qytetarit dhe qeveritarit”, perfundoi Berisha.
