Një lidhje e ngushtë e Olsi Ramës dhe person me njohje të thella në kabinetin qeveritar, pasi ka mbajtur detyrë të rëndësishme edhe në Ministrinë e Mbrojtjes, Amant Josifi, është shpalllur në kërkim nga autoritetet spanjolle.
Josifi që përflitet si krahu i djathtë i vëllait të kryeministrit Edi Rama është i kërkuar për aktivitet kriminal me skemën e grabitjes së miliona eurove nga europianët përmes call-centerave Forex dhe Bitcoin.
Sipas “El Pais” aksioni që çoi në zbërthimin e skemës është koordinuar nga Eurojust me pjesëmarrjen e forcave ligjzbatuese nga disa shtete, pasi mijëra qytetarë në vendet e BE shprehën shqetësimin se duke u kontaktuar me “call center”, josheshin përmes mashtrimit për të investuar shuma monetare në tregjet e kriptovalutave, mallrave dhe produkteve të tjera financiare.
“Duke përdorur call-center 24 orësh me bazë në Ballkan, një rrjet ndërkombëtar kriptomonedhash ka bërë më shumë se 200,000 ‘viktima’ në Europë, shumica prej tyre në Gjermani, Itali dhe Spanjë”, raporton media spanjolle.
“El Pais” sqaron më tej se “një urdhër-arresti është lëshuar për Amant J.”.
“Një pronar call-center me lidhje të nivelit të lartë me qeverinë shqiptare, i cili është edhe këshilltar i Ministrisë së saj të Mbrojtjes”. Sipas burimeve policore, kriminelët kanë grumbulluar 2.5 miliardë dollarë (2.4 miliardë euro) nga qindra mijëra viktima në mbarë botën”, sqarohet në artikull.
Lëshimin e urdhër-arrestit për Josifin e ka komentuar edhe ish-kryeministri Sali Berisha, i cili e kishte denoncuar më herët skemën e mashtrimit me kriptomonedhat që ishte ngritur në Tiranë.
“Këtu kam denoncuar vjedhjet që po bëhen me bitcoin. Këtu kanë zbarkuar policitë e vendeve të BE-së, sepse rrjeti i ‘call center’-ave i identifikuar tani të një biznesmeni që quhet Amant Josifi, biznesmen pushteti ai që ka mbulimin e plotë të Olsi Ramës, u ka vjedhur qytetarëve evropian 2.2 miliardë euro. Duke i joshur, duke i mashtruar, blini Bitcoin dhe vendoseni në këtë aplikacion se kompania jonë do ua vlerësojë 30% më shumë dhe ky Bitcoin kalon në kuletat e hajdutëve shqiptarë, konvertohet në lekë ose depozitohet në Emiratet e Bashkuara. Ky është një nga mekanizmat që Rama do t’ia kalojë edhe princit të Emirateve për pasuri. Alabbar është i pasur, por Rama në këtë mënyre do bëhet më i pasur se Alabbar”, theksoi Berisha.
Gjatë një takimi me demokratët e njësive 1 dhe 3 në Tiranë, kreu i PD tha se këto call-center-a patronohen nga Olsi Rama, ndërsa nënvizoi edhe faktin se Josifi ka qenë këshilltar i Olta Xhaçkës.
“Kuptoni çfarë bëjnë këta me call centerat e këshilltarit të Olta Xhaçkës, ministres strategjike. Ftojnë qytetarët evropianë, blini bitcoin. Punonjësve u thuhej mos kini merak se qeveria nuk na trazon”, shtoi kreu i opozitës.
