Kievi pritet që të goditet nga një stuhi dëbore të dielën, ndërsa temperaturat kanë zbritur nën zero si ditën ashtu edhe natën. Në këto ditë të ftohta dimri, miliona njerëz që jetojnë në kryeqytetin e Ukrainës vijojnë të jenë pa energji elektrike dhe ngrohje.
“Ukrainasit kanë kaluar nëpër gjëra të tmerrshme. Dhe pavarësisht gjithçkaje, ata kanë ruajtur aftësinë për të mos u bindur dhe dashurinë e tyre për lirinë. Dikur donin të na shkatërronin me uri, tani me errësirë dhe të ftohtë. Ne nuk mund të thyhemi.”- shprehet presidenti ukrainas Volodymyr Zelensky.
Ndërkohë, kompania ukrainase e shpërndarjes së energjisë elektrike Dtek ka shkruar një mesazh në Facebook për kryeqytetasit, duke premtuar se ndonëse priten më shumë ndërprerje në Kiev, duke nisur nga sot ato nuk do të zgjasin më shumë se 5 orë rresht.
“Ne e kuptojmë se mungesa afatgjatë e energjisë elektrike ndërlikon jetën e banorëve të Kievit. Prandaj, nga sot Dtek do të ndezë dritat për të gjithë banorët në mënyrë të alternuar, në mënyrë që ndërprerja e energjisë për çdo përdorues të mos kalojë 5 orë”, raporton UNIAN.
Lufta në Ukrainë ka arritur ditën e 277-të.
