Sekretariati për Procedurat, Votimet dhe Etikën në Kuvend, i drejtuar nga Klotilda Bushka, ka përjashtuar për 5 ditë nga punimet parlamentare deputetin e PL-së Petrit Vasili.
Vendimi vjen pas përplasjes verbale të Vasilit gjatë seancës së sotme plenare, me kreun e grupit parlamentar socialist, Taulant Balla.
Në një njoftim zyrtar, Kuvendi thotë se Vasili “ju drejtua me fjalë fyese Kryetarit te Grupit të PS, z. Balla, në fillim të punimeve te seancës plenare, datë 24.11.2022”.
“Në zbatim të nenit 63 pika ç dhe nenit 65/1 të Rregullores së Kuvendit, Sekretariati vendosi me 3 vota Pro, marrjen e masës disiplinore ‘Përjashtim nga pjesëmarrja në komisione dhe në seancë plenare për 5 (pesë) ditë’ për deputetin z. Petrit Vasili. Vendimi hyn në fuqi ditën e nesërme”, thuhet më tej në njoftim.
Debati mes të dyve u shoqërua mes fyerje nga të dyja palët. Megjithatë, deri më tani, nuk është raportuar nga Kuvendi për masë ndaj Taulant Ballës.
