Sa herë bëhet fjalë për emigrimin e paligjshëm dhe ka diskutime të ashpra për çështjen e azilkërkuesve dhe dështimin e politikave të Home Office, ligjvënësit britanikë do ta adresojnë problemin duke iu referuar shqiptarëve.
Këtë ka bërë sërish mbrëmjen e djeshme në Komitetin e Çështjeve të Brendshme në Commons, ministrja e Brendshme e Britanisë së Madhe, Suella Braverman, e cila nuk i ndahet shqiptarëve pavarësisht se termi “pushtim” dhe retorika e saj kriminale u kritikuan fort si në Tiranë dhe në Londër, në një tubim që pa mbi 3500 shqiptarë të protestonin në sheshin para Westminster.
Gjatë debatit për paaftësinë ose neglizhencën e punonjësve të Home Office për të trajtuar në kohë kërkesat për azil, pasi u zbulua se çdo punonjës i çështjeve zgjidh vetëm një kërkesë për azil në javë, Braverman tha se “vetëm 36 nga 12,000 emigrantët shqiptarë që kanë arritur në Britani këtë vit janë deportuar direkt nga qendra e pritjes së emigrantëve në Manston”.
Teska raportonte para deputetëve, Braverman zbuloi se stafi i Home Office do të marrë bonuse deri në 2500 £ për të shpejtuar procesin, pasi synimi i qeverisë së Rishi Sunak është katërfishimi i shkallës me të cilën zgjidhen kërkesat.
Por deputeti i partisë Konservatore ku edhe ministrja bën pjesë, James Daly i tha asaj se ishte “paaftësia e gradës” që secili nga 1000 punonjësit e çështjeve të azilit të Home Office merrte vetëm një vendim në javë, teksa numri i dosjeve të mbartura arrin në 122,000.
Por, Braverman tha se po bëhen lëvizje për të përmirësuar procesin e vendimmarrjes me synimin për të rritur numrin e kërkesave që secili anëtar i stafit proceson, ndërsa departamenti synon të punësojë 500 punonjës shtesë deri në mars.
“Ka pasur presione në rritje mbi sistemin e azilit për disa vite. Jam dakord që jemi në krizë. Nuk mendoj se është e drejtë të përpiqemi të minimizojmë sfidën me të cilën po përballemi ose të sugjerojmë se është e lehtë për t’u rregulluar”, tha ajo.
Më tej Braverman pranoi se qeveria ka dështuar në mbrojtjen e kufijve, por papërgjegjshmërish fajësoi emigrantët që kalojnë Kanalin për “abuzim me bujarinë e popullit britanik“.
Ndërkohë, deputeti konservator Lee Anderson i tha Braverman se departamenti po vendoste dhjetëra mijëra azilkërkues në hotele “sepse Ministria e Brendshme ka dështuar të kontrollojë kufijtë“.
“Ne kemi dështuar të kontrollojmë kufijtë tanë, po, dhe kjo është arsyeja pse Kryeministri dhe unë jemi absolutisht të vendosur për ta rregulluar këtë problem“, u përgjigj ajo.
E pyetur se si Home Office arriti të mbajë 4,000 emigrantë në kushte të këqija në Manston, Braverman tha se “unë do t’ju them se kush është fajtori, është shumë e qartë se kush e ka fajin“, duke drejtuar gishtin nga autoritetet.
“Janë njerëzit që po thyejnë rregullat tona, që vijnë këtu ilegalisht, duke shfrytëzuar njerëzit e cenueshëm dhe duke u përpjekur të abuzojnë me bujarinë e popullit britanik”, nënvizoi ajo.
Burimi: DailyMail/ Përshtati: Boldnews.al
