Deputeti Enkelejd Alibeaj deklaroi se ai dhe mbështetësit e tij do të marrin pjesë në zgjedhjet lokale, por me kandidatë të ndryshëm nga kryedemokrati Sali Berisha.
I ftuar në studion e “Debat”, Alibeaj tha se do të dalë me kandidatët e tij në të 61 bashkitë, me këshillin bashkiak dhe me një kandidat”. Ndërsa për zgjedhjet e pjesshme lokale të 6 marsit, fituesin e Shkodrës, Bardh Spahinë e ka cilësuar kandidat të Lëvizjes Socialiste për Integrim dhe Partisë Demokristiane.
“Partia Demokratike nuk mund t’ia lejojë vetes të mos futet në zgjedhje. Unë përgjigjem vetëm për këtë pjesë. PD-ja do të marrë pjesë në zgjedhje në të 61 bashkitë, me këshillin bashkiak dhe me kandidatët. PD-ja do të dalë me një kandidat. Nëse i referoheni 6 marsit, PD-ja ka pasur një kandidat, ndërsa kandidati tjetër ka qenë i Shtëpisë së Lirisë, që ishte koalicioni mes LSI-së dhe Partisë Demokristiane”, u shpreh Alibeaj.
Po ashtu, Alibeaj listoi edhe kushtet që duhet të plotësojë kandidati që do të mbështetet nga ai.
“Unë besoj në disa vlera idealiste, besoj që ai kandidati nuk duhet të ketë gjurmë të korrupsionit, nuk duhet të ketë gjurmë të lidhjes me krimin dhe duhet të jetë antiteza e kandidatëve që paraqiten nga mazhoranca. Publiku, ai që përcakton fituesin, nëse nuk sheh shëmbëlltyrën e vet te kandidati, mund të bësh aleancën më të madhe artificiale, e të dalësh zero me xhufkë. Arma e vetme e opozitës kundër mazhorancës është morali. Në kushtet e një regjimi, arma e vetme e publikut është morali,”-shtoi ai.
