Shkodra është qyteti i goditur më rëndë nga moti i keq që ka mbërthyer vendin në 24 orët fundit me shumë zona që janë zgjuar nën pushtetin e ujit dhe dhjetëra banorë të evakuuar.
Kryeqendra e Veriut regjistroi edhe dy viktima si pasojë e motit të keq, teksa prurjet e furishme bënë që rrjedha e përroit Shkrel të Malësisë së Madhe të merrte përpara makinën me të cilën udhëtonin Pjetër Rrushaj, së bashku me dy fëmijët e tij 13 dhe 18 vjeç.
48-vjeçari së bashku me të birin u gjetën të pajetë pas 16 orë kërkimesh nga RENEA, FNSH e banorë të fshatit Theth duke shkaktuar një tragjedi në familjen Rrushaj, ndërsa fatmirësisht shpëtoi vajza e tyre.
Ndërkohë, situata raportohet të jetë rënduar më tepër për shkak të hapjes së portave të shkarkimit në tre HEC-et kryesore, Fierzë, Koman dhe Vau i Dejës.
Teksa situata në Shkodër është problematike dhe alarmante, drejt qytetit është nisur me urgjencë kryetari i Partisë Demokratike, Sali Berisha.
Lajmi është konfirmuar nga zyra e shtypit të PD-së.
“Për shkak të gjendjes emergjente ne vend, kryetari i PD Sali Berisha niset për Shkodër”, thuhet në njoftim.
