Në Bruksel është mbajtur një takim urgjente i Borrellit me krerët e Kosovës dhe Serbisë për targat. Së pari mbahen takime të ndara pastaj takimi trepalësh.
Kryeministri i Kosovës, Albin Kurti sapo ka përfunduar takimin urgjent me kryediplomatin europian.
Pas takimit me Kurtin, Borrell ka nisur bisedimet me Aleksandër Vuçiçin e Serbisë.
Borrell tha mbrëmë se e ka thirrur këtë “takim urgjent”, për shkak të nevojës për të shtensionuar situatën.
“T’i japim fund menaxhimit të krizave të vazhdueshme dhe në vend të kësaj të fillojmë të përparojmë drejt normalizimit të marrëdhënieve”, shkroi ai në Twitter.
Që nga vendimi i Qeverisë për riregjistrimin e makinave me targa serbe në ato të Kosovës në fund të qershorit, situata në veri është e tensionuar.
Takimi i sotëm në Bruksel është thirrur një ditë para nisjes së zbatimit të fazës së dytë – shqiptimit të gjobave prej 150 eurosh për shoferët me targa ilegale.
Serbët në veri të Kosovës, ku përbëjnë shumicën, kanë paralajmëruar se do të kundërshtojnë shqiptimin e gjobave, ashtu siç kanë kundërshtuar gjithë vendimin e Qeverisë për targa.
