Konfiskimi i objekteve pa leje, një operacion që nisi vrullshëm dhe me kërcënime të ashpra nga kryeministri Edi Rama, aq sa vetë Belinda Balluku dhe Bledi Çuçi i shkuan poshtë pallateve edhe klientëve e miqve të qeverisë si Pëllumb Salillari e Julian Morina (Lul Morina), ka qenë subjekt i një video-mesazhi të postuar sot në Facebook nga kreu i qeverisë.
Rama zgjodhi të sulmonte Prokurorinë lidhur me ndërtimet pa leje, pas një heshtje të gjatë dhe “shfryrjes” së aksionit, aq sa para Gjykatave inspektorët dhe policia kanë nxjerrë të akuzuar qytetarë të varfër e të sëmurë vetëm për një mur apo kotec pulash.
Edhe pse Salillarit e Lulit të Ramës nuk i hyri gjemb në këmbë, pasi çështja e kateve të tyre pa leje u “shpërbë si me magji” duke “legalizuar” me kosto të ulët (350 euro për metër katrorë) ndërtime shumë-katëshe të paligjshëm në zona si Liqeni i Thatë apo liqeni i Farkës, kryeministri u përpoq të tregonte se nuk e ka harruar aksionin e nisur me bujë, por që doli të jetë “furtunë në gotë”
Në video mesazhin e sotëm Rama tha se konfiskimet nuk i japin askujt imunitet nga drejtësia, ndërsa shtoi se ka firmosur 15 procedura konfiskimi ndërtimesh, ku sipas tij për qëllime fitimi janë tejkaluar kufijtë ligjorë të lejeve ose në disa raste është ndërtuar pa leje.
Kreu i ekzekutivit nuk sqaroi se kujt i përkasin 15 ndërtimet e reja që ai i kërkon Prokurorisë t’i konfiskojë për llogari të shtetit, por mbrojti veten nga akuzat për “pazare” me biznesmenët pranë tij për kate pa leje, duke thënë se qeveria nuk e ka fuqinë ligjore të amnistojë askënd.
Sakaq, inatin që ka me sistemin e drejtësisë (sikur t’i kishin lejuar Prokurorët kullat e pallatet anembanë Tiranës e bregdetit dhe jo inspektorët bashkiakë dhe të territorit), Rama e nxori duke e sulmuar edhe njëherë organin e akuzës, teksa tha se “letrat kanë kohë që flenë nëpër prokuroritë e rretheve”.
VIDEOMESAHZI I RAMËS:
Sot kam firmosur pas kalimit në të gjitha hallkat ligjore, plot 15 procedura konfiskimi ndërtimesh, ku për qëllime fitimi janë tejkaluar kufijtë ligjorë të lejeve ose në disa raste është ndërtuar komplet pa leje fare. Ndërtimet e konfiskuara do të përdoren për interes publik. Hapësirat e marra do t’i kalojnë shtetit, që sipas rastit do t’i shfrytëzojë për mjedise zyrash për administratën, për strehim social ose shërbime sociale.
Ky operacion ligjzbatimi, i cili ka vazhduar përtej Tiranës, në një fushë ku e dini shumë mirë, të gjithë ka pasur shumë probleme në 30 vjet, dhe ku kemi ardhur duke ngushtuar rrethin e shkeljeve, përbën edhe kapakun e kësaj historie, pasi s’besoj se do gjenden më të atillë të marrë që t’i hyjnë një aventure me fund të paralajmëruar.
Kur e nisëm çfarë nuk dëgjuam dhe me çfarë nuk u helmua opinioni publik! “Është thjesht shoë për të larguar vëmendjen”! Ja që nuk ishte e vërtetë. “Është pazar me oligarkët për t’ua kthyer mbrapsht të legalizuara metrat e katet pa leje”! Ja që as kjo s’ishte e vërtetë.
“Është amnisti për t’i shpëtuar nga ndëshkimi ligjor”! Gënjeshtër e madhe edhe kjo, sepse qeveria nuk e ka fuqinë ligjore të amnistojë askënd dhe edhe po të dojë madje dhe konfiskimet nuk i japin askujt imunitet nga drejtësia. E vërteta është që për të gjitha këto, letrat kanë kohë që flenë nëpër prokuroritë e rretheve.
Fatkeqësisht jetojmë në një kohë ultësie morale e tretjeje të normave etike, ku pasqyrat e informimit janë shëmbëlltyrat më ulëritëse të dezinformimit dhe ku gjysme të vërtetat, të cilat janë edhe gënjeshtrat më të mëdha, mbushin pa pushim kanalet e komunikimit. Gjithsesi, unë do të vazhdoj të them atë që bëj dhe të bëj atë që them, deri në fund.
