Brazili, Argjentina dhe Franca shihen si ndër favoritët kryesorë për ta fituar Kupën e Botës 2022, por cila nga këto kombëtare favorizohet më së shumti?
Kupa e Botës 2022 është këtu më në fund. Turneu në Katar do të nisë këtë javë, me ndeshjen hapëse mes Katarit kundër Ekuadorit nesër në orën 17:00.
Gara për çmimin e madh do të jetë shumë e fortë këtë herë, me ekipe kombëtare si kampioni në fuqi Franca që është nisur drejt Lindjes së Mesme me synimin për ta mbrojtur titullin.
Por prania e Brazilit, Argjentinës dhe Portugalisë së udhëhequra nga Neymar, Lionel Messi e Cristiano Ronaldo, përkatësisht, do t’ua bëjë francezëve tejet të vështirë mbrojtjen e kurorës.
Favoritët e Kupës së Botës
Këtë vit, favoriti kryesor për të arritur sukses global është Brazili i Tites. Bet365, ndër kompanitë kryesore botërore të basteve, i ka vënë kuotën 6.00 Brazilit për ta fituar Botërorin për herë të gjashtë në përgjithësi dhe për herë të parë në 20 vitet e fundit.
Ka kuptim që kombëtarja e Amerikës Jugore të vlerësohet kaq lart, duke qenë se e ka humbur vetëm një ndeshje në dy vitet e fundit. Megjithatë, ajo disfatë e vetme – në duart e rivalit të përjetshëm Argjentinës – i kushtoi me humbjen e titullit në Kupën e Amerikës 2021.
Argjentina shihet si favoriti i dytë pas Brazilit, pasi e ka kuotën 6.50 për ta fituar Botërorin, i cili, më gjasë, do të jetë i fundit për yjet si Lionel Messi dhe Angel Di Maria. Argjentina nuk e ka fituar Botërorin që nga viti 1986.
Franca mahniti në kualifikime për Botëror duke e mbyllur fushatën pa asnjë humbje, dhe si kampion në fuqi, ajo vlerësohet të jetë favoritja e tretë për ta fituar Botërorin e sivjetmë.
Gjelat e udhëhequr nga Didier Deschamps zhgënjyen në Kampionatin Evropian 2020 vitin e kaluar dhe tani vlerësohen me kuotën 7.00 për ta fituar Botërorin e dytë radhazi.
Anglia vjen në radhë me kuotën 9.00, ndërsa Spanja ka kuotën 9.50 për ta fituar Botërorin.
Gjermania (11.00), Holanda (13.00), Portugalia (15.00) dhe Belgjika (17.00) vlerësohen si autsajderë nga bet365.
