Kryetari i PD-së, Sali Berisha i konsideroi vjedhje të pastra dy tenderët e fundit që janë prokuruar nga ARRSH e Ministria e Infrastrukturës dhe Energjisë për ndërtimin e skarpateve të rrugës së Arbrit që do të kushtojë 20 milionë euro dhe 46 kilometrat e rrugës Lekaj-Fier me vlerë 320 milionë euro.
Favorizimin e kompanisë “Gjoka” dhe “Fusha Shpk” në dy tenderat në fjalë, lideri i opozitës ia faturoi ministres Belinda Balluku, për të cilën tha se është vasale e kryeministri Rama dhe dirigjente e vjedhjeve miliona euroshe.
“Hap Balluku tenderin e skarpateve, ia jep kompanisë Gjoka. Unë nuk kisha dëgjuar gjatë karrierës sime 30 vjeçare këtë. Çfarë do të thotë 20 milionë euro skarpate. Po 300 milionë euro që janë harxhuar deri tani për çfarë ishin. Është kot t’ia citosh emrin asaj zonje, është vasale mekanike e Ramës, bën çfarë i thotë ai dhe kaq. Ajo është vërsulur mbi pasuritë e shqiptarëve e papërmbajtur. Ajo po shkel rregullat, ligjet, po abuzon me fondet”, tha Berisha.
Tenderat për të cilët Berisha foli sot me emra konkretë, Boldnews.al i ka bërë publik në një sërë raportimesh denoncuese të pak ditëve më parë, duke informuar publikun se po realizohet një “masakër” me fondet publike.
Më konkretisht, tenderi i skarpateve që Berisha e konsideroi qesharak, është një procedurë e ARRSH për të tenderuar 10 mln euro për “Planin e Bardhë”.
Më 21 Shtator 2022, Autoriteti Rrugor Shqiptar shpalli procedurën tenderuese “Sistemimi dhe rivitalizimi i skarpateve në Plani i Bardhë”, pjesë e Rrugës së Arbrit, me fond limit 11.7 miliardë lekë të vjetra ose 10 milionë euro.
Edhe ky tender u shoqërua me dyshime për fryrje të faturës së Rrugës së Arbrit. Dyshimet paraprake mbi procedurën forcohen edhe në shpalljen e fituesve. Sipas të dhënave zyrtare, rezulton se në garë kanë marrë pjesë 6 konkurrentë. Në përfundim, fitues është shpallur bashkimi i operatorëve “Selami” + “Company Riviera 2008” + “Garden Line”.
Oferta e fituesit është 11.1 miliardë lekë të vjetra, por kjo ofertë nuk ishte më e ulta edhe pse ARRSH e shpalli fituese, pasi eliminoi konkurrentët e tjerë.
Ndërkohë sa i përket koncesionit 320 milionë euro të qeverisë shqiptare për segmentin rrugor Lekaj-Konjat-Fier (Loti i Parë i autostradës Milot-Fier), ai është prokuruar nga Ministria e Energjisë dhe Infrastrukturës dhe do të ketë afat 35 vjeçar, ndërsa lëvizja do të bëhet me pagesë.
Ajo çka ra në sy në këtë tender është se “Fusha SHPK” (ndër firmat ortake më të besuara të qeverisë) ishte ofertuesi i vetëm, ndërsa oferta u paraqit në buletinin e Agjencisë së Prokurimit Publik si e propozuar nga një grup i përbashkët i disa operatorëve ekonomik.
Për koncesionin në fjalë, Berisha tha se është një vjedhje e paprecedentë pasi rruga është ekzistuese.
“E morët vesh ju, u krijua konsorciumi me në krye ligj-Fushën për të rikonstruktuar një rrugë me 7 milionë euro/km. Prandaj nuk rriten rrogat dhe pensionet. Prandaj shqiptarët largohen çdo ditë e më shumë. Si e justifikon ajo këtë tender Lekaj-Fier që është e gjitha në fushë? Në një pjesë dërrmuese ka rrugë anësore, ish-rrugën e vjetër. Shikoni çfarë hajdutërie, për të sistemua me rrugë anësore aksin Lekaj- Fier 46 km hap tenderin me 340 milionë euro, 7 milionë euro/km. Ndërkohë që ndërtimi i autostradës kushton 3 milionë euro për km. Pse nuk zgjeron rrugën Tiranë- Durrës, apo Shkodër- Lezhë. Këto dyja janë akset më problematike në vend. Këta kanë humbur çdo sens. Prandaj edhe Shqipëria është në fazë eksplozive”, tha Berisha.
LEXO EDHE:
40 mln euro pa garë në vetëm 3 tendera, ARRSH “masakër” mbi fondet publike
Rama i dhuron “Fusha SHPK” koncesionin 320 milionë euro të rrugës Lekaj-Konjat-Fier
