Banorët e Bërxullës, të cilët kanë protestuar në mënyrë të vazhdueshme për të mbrojtur tokat e tyre nga projekti i autostradës Thumanë-Kashar e kanë zhvendosur ditën e sotme protestën përballë Kuvendit.
‘Ne kemi dhe deputet zone që nuk është parë asnjë ditë. Është Orlando Rakipi. Ai ka tagrin dhe është deputet i zonës, duhet të na prijë i pari e jo të mos na e hapë telefonin. ‘- tha një nga banorët.
“Projekti i rrugës duhet të kishte nisur që në vitin 2019. Shteti dhe Qeveria për të mbyllë dëmshpërblimin i lidhi direkt pa garë kontratën. Dëmi ishte gati rreth 110 mln euro. Ne kemi përgatitur dosjen dhe do e çojmë në SPAK. Duhet që të veprohet në mënyrë urgjente, e jo siç po veprohet në çështje të tjera. Ditën e shtunë do jemi në terren, do fotografojmë të gjitha mjetet që janë duke punuar, sa janë hedhur në mënyrë të paligjshme. Kjo rrugë nuk ka ende një tabelë se si do të zhvillohet”, është shprehur i revoltuar një banor.
Banorët shprehen se nuk do të lejojnë zhvillimin e këtij projekti pa marrë kompensim për pronën sipas çmimit të tregut.
“U spostuam nga kryeministria deri te parlamenti që të bëjmë me dije të drejtën tonë që po shkelet nga vetë pushtetarët. S’ka përgjigjie nga institucionet se çfarë do bëhet me pasurinë tonë që e kemi me çertefikatë e të gjitha. Ku do vemi ne?”-tha një nga banorët.
Një tjetër u shpreh se do luftojnë në mënyrë ligjore deri në momentin e fundit, duke theksuar se më pas nuk dihet si do përshkallëzojë situata.
“Duke parë ecurinë e gjithë këtyre ditëve që protestojmë, na janë shuar shpresat, kërkesat tona janë në vesh të shurdhër. Rruga është 22 metër e gjerë plus 40 metra mur mbajtës, pse bëhet ky mur? Pse të kushtojë gjithë këto metra katrorë, këta duan të fusin lekë në xhepat e tyre. Me pronën time pasurohen, më hiqet prona përgjithnjë dhe ai e shfrytëzon, e patolerueshme”-përfundoi një tjetër banor.
Ditën e djeshme banorët protestuan përpara kryeministrisë. Ata mbanin në duar parrullat që shkruanin “Shteti na ka shitur tek koncesionari” dhe shprehën për mediat shqetësimin se po trajtohen si skllevër dhe jo si qytetarë me të drejta të barabarta.
“Na kanë bërë tortura psikologjike, na kanë bërë torturë financiare. Drejtori i policisë, ministri, kryeministri duhet ta dinë shumë mirë se ne duhet të shpronësohemi sipas ligjit. Ata e kanë detyrim ligjor që të na sqarojnë, të na bindin dhe të na mbrojnë nga oligarkët. Ne na trajtojnë si bujkrobër, si skllevër. Ja këto janë pushtetarët tanë”, tha njëri prej banorëve.
Pavarësisht presioneve, banorët shprehen se nuk do të tërhqien nga kauza e tyre, por do vazhdojnë të protestojnë deri sa të marrin dëmshpërblimin që meritojnë.
