Kanë mbetur vetëm katër ditë që topi të rrokulliset në Katar. Të dielën e 20 nëntorit, në orën 17:00, do të fillojë Botërori me ndeshjen hapëse mes ekipit pritës të Katarit dhe Ekuadorit. Por do të jenë gjithsej 32 skuadra që do të garojnë për fitoren e Kupës së Botës.
Futbollistët do të jenë protagonistët kryesorë të këtij Botërori. E megjithëse ka shumë dyshime për këtë ngjarje, një pjesë e madhe e publikut pyet veten: sa do të fitojnë lojtarët e Botërorit “Katar 2022”? Sa para do të shpërndajë FIFA?
FIFA ka njoftuar kompensimin për klubet, që do të kontribuojnë me lojtarë në Kupën e Botës “Katar 2022”. Ajo do të shpërndajë më shumë se 200 milionë dollarë mes klubeve që huazojnë lojtarët për ekipet kombëtare që do të luajnë në Kupën e Botës “Katar 2022”. Në total, njësia më e lartë e futbollit botëror, do të ndajë 440 milionë dollarë amerikanë, me një maksimum prej 370.000 për lojtar.
Po ashtu, në deklaratë bëhet e ditur, se këtë kompensim do ta marrin edhe të gjitha klubet në të cilat kanë luajtur futbollistët në dy vitet para këtij Botërori. Pas Kupës së Botës në Rusi në vitin 2018, nga programi i FIFA-s përfituan gjithsej 416 klube nga 63 vende.
Sa para merr kampioni i Kupës së Botës në “Katar 2022”?
Çmimi i FIFA-s për kampionin është vendosur në 42 milionë dollarë, shifra më e lartë ndonjëherë për një Kupë Bote. Ky moment historik deri më tani i përkiste Francës, e cila për titullin e saj në Rusi 2018 kishte marrë 38 milionë dollarë.
Fituesi i Kupës së Botës: 42 milionë dollarë (më shumë se 40 milionë euro).
Skuadra klasifikuar e dyta në Botëror: 30 milionë dollarë (gati 29 milionë euro).
Ekipi i renditur i treti: 27 milionë dollarë (gati 26 milionë euro).
Skuadra e katërt: 25 milionë dollarë (gati 24 milionë euro).
Ekipet e klasifikuara nga vendi i 5-të në të 8-të: Nga 17 milionë dollarë për ekip (më shumë se 16 milionë euro); 68 milionë në total.
Ekipet e klasifikuara nga vendi i 9-të në të 16-të: Nga 13 milionë dollarë për ekip (pothuajse 12.5 milionë euro); 104 milionë në total.
Ekipet nga vendi i 17-të deri në të 32-tin: Nga 9 milionë dollarë për ekip (pothuajse 8.5 milionë euro); 144 milionë në total.
Siç ka deklaruar FIFA, shuma prej 10 mijë dollarësh në ditë, shumëzohet me numrin e ditëve që çdo futbollist qëndron në Kupën e Botës, duke llogaritur nga dy javë para ndeshjes hapëse dhe një ditë pas ndeshjes së fundit të skuadrës së tij. Më pas, shuma totale për lojtar u shpërndahet klubeve, në të cilët lojtari ishte regjistruar gjatë dy viteve të fundit para Kupës së Botës.
