Deputetja e Partisë së Lirisë, Monika Kryemadhi ka komentuar lëvizjet e bëra sot nga SPAK në çështjen e inceneratorëve, ku 11 urdhër-arreste u lëshuan dhe 5 persona u vunë në pranga lidhur me aferën e djegësit të mbeturinave në Fier.
Kryemadhi në një postim në Facebook nënvizon se fakti që SPAK veproi duke goditur skemën e evazionit fiskal falë të cilës realizohej vjedhja e miliona eurove të fondeve publike, tregon që denoncimet e PL kanë qenë të sakta.
“Përshëndes veprimet e sotme për inceneratorët. Treguan se faktet që kam bërë publike janë të pamohueshme”, shkruan ajo.
Por, sipas Kryemadhit drejtësia po vepron me regji pasi nga burimet e saj e ka të konfirmuar se SPAK ka kërkuar pak kohë më parë arrestimin e kryebashkiakut të Fierit, Armando Subashi, por është frenuar që ta realizojë.
“Por, drejtësia nuk duhet të veprojë me regji dhe favorizime klienteliste! Burime të besueshme tregojnë se para pak muajsh SPAK ka kërkuar masë arresti për Armando Subashin dhe është frenuar. I njejti deformim po ndodh për hetimet e inceneratorit të Tiranës, për të shpëtuar Erion Veliajn dhe kokat e vërteta të aferës së inceneratorëve”, nënvizon Kryemadhi.
Ish-kryetarja e PL në vijim bën thirrje që “SPAK të godasë në shenjë për inceneratorët” dhe “mos të drejtohet sipas sulmeve që vijnë nga kongresi i partisë”.
“Po monitorojmë çdo veprim të autoriteteve për inceneratorët dhe do të bëjmë çdo gjë që të korruptuarit e qeverisë të njohin ligjin, ndërsa paratë dhe pronat publike t’i kthehen shqiptarëve”, deklaron ajo.
