Raketa që goditi Poloninë dje duke vrarë dy persona është lëshuar nga mbrojtja ajrore ukrainase në tentativën për t’iu kundërpërgjigjur “breshërisë” së raketave të lëshuara në orët e para të mëngjesit nga Rusia.
Qëndrimi në fjalë është tashmë zyrtar nga NATO dhe mbështetet nga presidenti polak Andrzej Duda, duke lehtësuar kështu frikën në Perëndim se sulmi mund të shtynte Aleancën në një konflikt të drejtpërdrejtë ushtarak me Rusinë.
Andrzej Duda dhe Jens Soltenberg kanë thënë se s’ka ‘asnjë provë’ se raketa është lëshuar nga Rusia, por që “S-300” e epokës sovjetike vinte nga Ukraina, e lëshuar për t’u mbrojtur nga Rusia.
“Nuk ka asnjë tregues se Polonia ishte shënjestruar qëllimisht. Mbrojtja e Ukrainës po lëshonte raketat e saj në drejtime të ndryshme dhe ka shumë të ngjarë që një nga këto raketa të ketë rënë për fat të keq në territorin polak”, tha Duda, duke shtuar se Rusia mban përgjegjësinë përfundimtare për sulmin, sepse Putini filloi luftën në Ukrainë.
Edhe kreu i NATO-s, e mbështeti analizën duke thënë se sulmi ka të ngjarë të jetë një raketë ukrainase, pasi nuk ka ‘asnjë indikacion’ se ishte e qëllimshme nga Rusia.
“Ky nuk është faji i Ukrainës. Rusia mban përgjegjësinë përfundimtare ndërsa vazhdon luftën e saj të paligjshme kundër Ukrainës”, shtoi Soltenberg.
E teksa situata e paprecedentë që ndodhi mbrëmjen e djeshme është sqaruar, një foto e krerëve të vendeve të NATO-s të mbledhur në Bali në kuadër të samitit G20, e shkrepur në momentin kur janë njoftuar për raketën e rënë në Poloni, po bën xhiron e rrjetit.
Joe Biden, Rishi Sunak, Olaf Scholz, Emmanuel Macron dhe Justin Trudeau duken të tronditur dhe ankthi mbizotëron qartë në shikimin që i japin njëri-tjetrit, pasi Lufta e Tretë Botërore nuk kishte qenë kurrë më pranë sesa mbrëmjen e djeshme.
