Stefano Pioli është vlerësuar dje me çmimin “Sporti dhe qytetari” nga Bashkia e Parmës. Ky eveniment ka qenë edhe rasti për 57-vjeçarin që të japë një intervistë të shkurtër, ndër të cilat nuk kaloi pa përmendur edhe momentin e Milanit.
Fitorja ndaj Fiorentinës tregoi se Milani beson gjithmonë.
Me siguri që sivjet jemi një ekip më i pjekur në pikëpamjen mendore dhe dimë t’i dallojmë mundësitë. Pas paraqitjes së shëmtuar në Kremona, e cila na dëmtoi renditjen, e dinim se duhej të reagonim kundër Fiorentinës. Patëm qasjen e duhur dhe luajtëm me ritëm të lartë ndaj një rivali që na krijoi shumë telashe.
Sa vlen një sukses i tillë?
Shumë sepse treguam se sa shumë besojmë. Cilësitë nuk na mungojnë dhe me shpirtin e duhur mund të mbërrijmë larg. Kemi shumë objektiva si Kupa e Italisë, Superkupa, Champions-i dhe sidomos kampionati. Grupin e kam të motivuar dhe kur djemtë të kthehen nga Botërori do ta bëjnë në mënyrën më të mirë.
Mund të na bëni një bilanc të kësaj pjesë të sezonit?
Ka qenë një kampionat anormal, i veçantë dhe shumë i ndërlikuar. Bilanci në këtë moment nuk do të ishte i saktë, sepse do të luajmë edhe 23 ndeshje kampionati dhe ka hapësirë për çdo skuadër që të thotë fjalën e saj. Napoli po bën një rrugëtim të jashtëzakonshëm, por duhet parë se si lojtarë të ndryshëm do të kthehen nga Botërori.
Keni ndonjë program për këtë ndalesë kaq të gjatë?
Përvoja është e pakët në këtë aspekt, sepse nuk ka ndodhur kurrë që përpara një Botërori në mes të sezonit të ishin luajtur kaq shumë ndeshje. Unë kam planifikuar të grumbulloj djemtë për një javë në “Milanello” e më pas do të zhvendosemi në Dubai për 10 ditë, ku do të presim djemtë e Botërorit që të na bashkohen.
Çfarë emocionesh përjetoni kur dëgjoni korin e tifozëve?
Është shumë i veçantë dhe më emocionon. Asnjëherë nuk jam i sigurt se do ta dëgjoj. Ma kushtuan lojtarët e mi e më pas e huazuan tifozët, që nisën të ma këndonin përpara çdo ndeshjeje gjatë sezonit të kaluar kur luftonim për titullin. Më jep shumë kënaqësi dhe emocionohem sa herë shoh imazhe nga sezoni i kaluar. I dhuruam vetes dhe të gjithë popullit milanist aq shumë emocione të bukura sa më duket si një ëndërr e mrekullueshme.
E të mendosh që Milanin nuk e cilësonin si mes ekipeve të forta…
Për mua ishim ne më të fortë, sepse në momentin më të rëndësishëm të kampionatit, atëherë kur duheshin fituar 6-8 ndeshje radhazi, djemtë e mi u treguan fantastikë. E vërtetuan se ishin një grup i madh dhe dhanë shpirtin në fushë siç nuk e bëri dot askush tjetër nga rivalët tanë. Vërtetë kemi talent, por edhe punuam fort.
Si i vlerësoni De Ketelaren dhe afrimet e tjera të verës së kaluar?
Ne si klub kemi idetë dhe planet tona. Kur vjen puna për të investuar te të rinjtë, të gjithë janë të lumtur, por pastaj nuk kanë durim për t’i pritur. Po flasim për të rinj që vijnë nga vende të ndryshme, nga kultura të ndryshme e me zakone të ndryshme. Edhe loja e tyre ka dinamika të ndryshme. Është normale që ndonjëri të gjendet në vështirësi, por jemi absolutisht të bindur që kemi afruar lojtarë të talentuar, inteligjentë dhe të aftër për të rritur nivelin e tyre e rrjedhimisht të Milanit.
