Gjykata Administrative rrëzoi dje kërkesë-padinë e prindërve të fëmijëve të kopshtit “Zubeyde Hanim”, të cilët kërkuan anulimin e urdhrit të ministrisë së Arsimit që vendosi mbylljen e kopshtit.
Këtë të Martë, avokati mbrojtës u shpreh në një emision televiziv se gjykata ka shkelur ligjin, duke u ndaluar te afatet. Ai u shpreh se vonesa e gjykatës për të shqyrtuar këtë çështje ishte plot 25 ditë. Avokati Franc Terihati tha se një çështje e tillë kërkon shqyrtim brenda 5 ditësh ndërkohë që Gjykatës Administrative ju deshën 30 të tilla.
Po ashtu, sqaroi se gjyqtaria që dha vendimin duhet të ishte zëvendësuar. Por, shtoi, se kjo nuk ndodhi duke mos u plotësuar parakushtet për një vendim të drejtë.
“Është rrëzuar kërkesa për sigurimi e padisë, prindërit kërkuan masë pezullore dhe gjykata mori një vendim të ndërmjetëm. Lidhur me vendimin që ka marrë dje gjykata unë do ndalen në dy momente, fillimisht tek procedura që ka ndjekur kjo gjykatë para vendimit të djeshëm. Shkeljet filluan disa javë para se të merret ky vendim. Për tre shkaqe”, tha avokati për emisionin “Kafe Shqeto” në “Syri Tv”.
Gjyqtarja
Më tej sqaroi:
“Kjo gjykatë është caktuar me procedurë manuale dhe jo me procedurë shortimi. Pra është përzgjedhur. Fillimisht çështja ju caktua një gjyqtareje me short por ajo hoqi dorë. Dhe pasi ka hequr dorë gjyqtarja e parë, zv.kryetarja e Gjykatës ja ka kaluar në mënyrë manuale për ta shqyrtuar këtë çështje një tjetër gjyqtareje. Vetë ajo ka paraqitur një kërkesë për të hequr dorë. Ajo parashtroi dy fakte, i pari ‘unë nuk mund të caktohem pa short, me procedurë manuale’ dhe e dyta, vetë gjyqtarja ka thënë që ‘nuk e gjykon dot këtë çështje sepse jam shprehur njëherë. Dhe unë nëse do e gjykoj këtë çështje do marr të njëjtin vendim’. Pra gjyqtarja që më parë e ka mbajtur këtë qëndrim para se të merrte vendimin, dhe e ka paraqitur te zv.kryetarja e Gjykatës e cila nuk e ka pranuar kërkesën e saj për të hequr dorë. Nga ana tjetër, janë paraqitur dy kërkesa për përjashtimin e saj, të cilës i kanë rënë dhe dy gjyqtarë të tjerë, kërkesat e të dyve janë refuzuar. Pra tre kërkesa, dy nga këto për përjashtimin e gjyqtares janë rrëzuar duke mos u plotësuar parakushtet që ne të kishim një vendim të drejtë”.
Afatat
“Ajo që duhet theksuar është se Gjykata e mbajti këtë çështje pa shqyrtuar për 30 ditë ndërkohë që ligji parashikon një afat pesë ditor për shqyrtimin e një kërkese të tillë. Nuk besoj se mund të ketë një rast të tillë në gjithë historinë e Gjykatave shqiptare”, u shpreh Terihati.
