Gjykata Administrative ka rrëzuar kërkesë-padinë e prindërve të fëmijëve të kopshtit “Zubeyde Hanim”.
Kopshti “Zubeyde Hanim” prej kohësh është mbyllur nga qeveria, ndërsa prindërit e cilësojnë veprimin e padrejtë. Kundër vendimit, ata i janë drejtuar Gjykatës Administrative, nga ku kanë ngelur përsëri të zhgënjyer.
Në një seance që zgjati për më shumë se 1 orë e 30 minuta, Gjykata nuk ka marrë parasysh kërkesën e prindërve të cilët nëpërmjet një kërkesë-padie kërkuan anulimin e urdhrit të ministrisë së Arsimit që vendosi mbylljen e kopshtit.
Në përfundim të seancës, avokati e cilësoi të paligjshëm vendimin duke paralajmëruar ankimi në Apel.
“Kopshti do të vijojë i mbyllur. Gjykata mbylli veshët kur ne paraqitëm faktet. Të gjitha argumentet që nuk janë marrë në konsideratë, do ti çojmë në Apel, duhet ti marri patjetër në konsideratë. Kjo çështje është në kundërshtim me ligjin”, u shpreh avokati.
Edhe prindërit u shprehën të zhgënjyer nga organet e drejtësisë duke deklaruar për mediat se prisnin më shumë prej tyre. Ata bëjnë apel për drejtësi, ndërsa paralajmërojnë apelim të çështjes deri në Strasburg.
“Sot ishte një show i vërtete, drejtësia jonë lë shumë për të dëshiruar. Duam të drejtën e fëmijës sonë. Duam ti shkollojmë aty ku mendojmë se shkollohen më mirë. Jemi shumë të zhgënjyer. Deri në Strasburg do të bëjmë tonë, Ky është realiteti ynë i hidhur”, tha një prej prindërve.
Mbyllja e kopshtit, pjesë e “Turgut Ozal” është cilësuar gjegjësisht si zbatim i një urdhri të qeverisë për të kënaqur Presidentin turk Erdgan. Institucioni besohet se financohet nga lëvizja “Gulen” e drejtuar nga Fehtullah Gulen, që për Ankaranë zyrtare është një grup terrorist.
Në një takim me ministren e Jashtme Olta Xhaçka në Ankara pak javë më parë, kryediplomati turk e përgëzoi për mbylljen e kopshtit.
Gjatë një vizite në Tiranë, Erdogan ka kërkuar publikisht mbylljen e institucioneve arsimore në vendin tonë që financohen nga lëvizja Gulen.
Përveç kopshtit, ministria mbylli edhe kolegjin për vajza “Mehmet Akif”, po ashtu pjesë e “Turgut Ozal.”
