Kryeministri Edi Rama ndodhet në një vizitë zyrtare në Shkup ku sërish nuk ka kursyer kritikat ndaj Bashkimit Europian.
Gjatë deklaratës për mediat, Rama ka kërkuar nga Bashkimi Europian që të përfshijë më shumë vendet e Ballkanit në “luftën” kundër rritjes së çmimeve apo edhe inflacionit.
“Kjo mbledhje është edhe në aspektin e përpjekjeve tona të përbashkëta për t’u bërë pjesë e BE, sepse e kemi kapërcyer hendekun e madh dhe torturues mes të qenit gati për të hapur bisedimet dhe refuzimit të vazhdueshëm nga ana e BE-së, sot të dyja vendet kanë celur procesin e negociatave dhe kanë hedhur një hap shumë para, në 6 dhjetor do të mbahet samite i BE me Ballkanin Perëndimor dhe do jemi së bashku me të gjitha dëshirat, problemet dhe sfidat tona që janë gjithnjë e më të njëjta me ato të BE dhe është koha për të projektuar të ardhmen duke kërkuar së bashku nga BE që të na përfshijë gjithnjë e më shumë në përpjekjen e organizuar për t’i rezistuar rritjes së çmimit qoftë edhe inflacionit. Mbështetja e marrë nga BE për buxhetet tona për përballimin e krizës është lajmi mirë, por nga ana tjetër nëse mbajmë parasysh se ato fonde janë një rialokim i fondeve IPA, duhet të jemi shumë më kërkues nga BE dhe nuk mund të mjaftohemi apo gëzohemi me këtë hap i cili është një hap i madh po të krahasohemi me momentet tragjike të pandemisë kur u lamë krejtësisht vetëm nga mundësia për të marrë vaksinat në fazën e parë. Është një hap gjysmak po të shikojmë se çfarë kemi nevojë dhe jo vetëm se çfarë mund të marrim, por edhe çfarë mund të japim për këtë komunitet”, tha kryeministri Edi Rama.
Këtë të hënë të 14 nëntorit, në Shkup mbahet mbledhja e përbashkët e qeverisë së Shqipërisë dhe asaj të Maqedonisë së Veriut ku do të nënshkruhen disa marrëveshje të rëndësishme mes dy vendeve.
