Kryetari i Partisë Demokratike, Sali Berisha deklaroi këtë të Hënë në një emision televiziv, se vota e lirë është një betejë jetike për shqiptarët.
Në një emision televiziv, Berisha tha se qëllimi parësor i PD-së është garantimi i votës së lirë. Sipas tij, Rama tenton ta vjedhje në çdo palë zgjedhje.
“Asgjë s’mund të zgjidhet nëse nuk zgjidhim votën, duhet të votojmë të lirë dhe ju siguroj se të tjerat zgjidhen. Rama po vijon me strategjinë e vjedhjes së zgjedhjeve. Unë po e ndjek dhe e konsideroj këtë një mision ndofta më të rëndësishëm që mund të bëhet. Ne duhet ti rikthejmë votën shqiptarëve, është çështje jetike për shqiptarët. Ose do votojmë ose do dezintegrohemi, do marri fund ky vend. Ç’ka nuk mund të ndodhë”, tha Berisha në “Syri Tv”.
Berisha tha se “s’ka forcë në botë që të na ndalojë të kthejmë votën e lirë”. “Ose kthejmë votën e lirë, ose shuhemi”, theksoi ai.
Mesazhi për protestuesit
Berisha u kërkoi protestuesve që të vijojnë të dalin në protesta. Lisi, tha ai, nuk rrëzohet me një të rënë.
“Është një betejë e vështirë në Shqipëri, është instaluar monizmi se Rma kontrollon pushtetet më shumë se Ramiz Alia në vitin 1991. Ne duhet tu faktojmë shqiptarëve se detyra e PD është para së gjithash për votën e lirë. PD bëri nja hap shumë të madh, do vazhdojnë hapa të tjerë. Atyre që mbushën bulevardin u them ta mbushin, ta mbushin përsëri. Si e mposhtëm monizmin? Paqësore ishin protestat. Atëherë thoshim ‘vdekje komunizmit’, tani do themi ‘vdekje monizmit’. Kemi ngritur një lëvizje që është misionare për të shpëtuar Shqipërinë. Kjo është betejë. Me një të rënë nuk rrëzohet lisi. Kjo e ka trondit. Unë e kam hallin te shqiptaret, të çlirohen nga frika”, u shpreh Berisha.
Ai zbuloi se protesta e radhës kombëtare do të zhvillohet në muajin Dhjetor.
“Vula” e PD
Lidhur me gjyqin për “vulën” e PD-së, Berisha paralajmëroi se nëse Rama prek flamurin e partisë, atëherë “do përleshemi me të”.
“Unë shoh Ramën në çdo skemë që bën për të grabit zgjedhjet. Ky do që ta asgjësojë PD-në, ta shpërndajë në parti 2 përqind dhe kaq. Nëse ky ja jep flamurin Alibeajt do përleshemi me të. Nëse na prek flamurin, unë besoj se demokratët do dinë ti përgjigjen, nëse ai mendon të konfiskojmë flamurin është betejë për jetë a vdekje për demokratët. Se nuk është flamur që është për të dorëzuar ai, se ka rrëzuar komunizmin”, tha Berisha.
