Afati i regjistrimit të kandidaturave në procesin e Primareve në Partinë Demokratike është mbyllur sot dhe një tjetër emër i rëndësishëm ka dalë në skenë.
Nënkryetari i PD, Luçiano Boçi është emri më i ri i propozuar për tu bërë pjesë e procesit, nga i cili do të dalin emrat e 61 kandidatëve të opozitës për zgjedhjet e 14 majit.
Mësohet se emri i tij është propozuar nga baza në Elbasan, por është ende e paqartë nëse Boçi do të pranojë të garojë.
Luçiano Boçi është një nga të paktët deputetë që në zgjedhjet e 25 prillit theu herësin e përcaktuar nga KQZ për të siguruar një vend në Kuvend.
Boçi ishte pozicionuar në vendin e shtatë në listën e qarkut të Elbasanit, poshtë vijës fituese pasi PD mori 6 mandate, por ai arriti të grumbullojë 9736 vota preferenciale duke tejkaluar pragun brenda listës.
