Policia e shtetit ka marrë masa paraprake përgjatë Bulevardit për protestën e opozitës të organizuar sot në orës 16:00.
Mësohet se rreth 1000 forca të policisë, duke nisur nga ato të rendit, FNSH dhe Garda e Republikës, pritet të jenë sot në terren për mbarëvajtjen e protestës.
Vëmendja më e lartë e forca blu është tek ruajtja e instituiconeve të rëndësisë së veçantë përgjatë Buleveradit ‘Dëshmorët e Kombit’ dhe bllokut të ministrive.
Policia ka instaluar përgjatë gjithë bulevardit ‘Dëshmorët e Kombit’ kamera me rezolucion të lartë ndërkohë që dyert e Kryeministrisë janë blinduar me veshje metalike që mbrëmjen e djeshme.
Në gatishmëri do të qëndrojnë dhe autobotët me ujë, shërbimi zjarrfikës dhe autoambulancat. Forcat e rendit janë të pajisura me maska kundragaz pasi ende nuk ka detaje se si do të shkojë protesta.
Ndërkohë në mes të protestuesve do të ketë dhe efektivë të veshur civilë për të identifikuar personat që mund të nxisin konflikte.
Kryetari i Partisë Demokratike, Sali Berisha ka bërë thirrje se protesta do të jetë paqësore. Protesta pritet që të zhvillohet përpara kryeministrisë, në orën 16:00 ndërsa nuk dihet saktësisht se për sa orë do të vazhdojë.
Qytetarët që do të marrin pjesë në protestën e thirrur janë organizuar për të mbërritur në kryeqytet.
Sipas informacioneve të marra nga kryetarët e degëve të PD-së nga qarku Korçë do të nisen një numër i lartë protestuesish. Nga dega e PD-së Korçë do të nisen mbi 400 protestues të cilët do të jenë të organizuar në 4 autobuza dhe me makina private.
Nga dega e PD-së së Devollit janë rreth 400 persona të cilët janë të organizuar me furgona dhe makina private.
Nga dega e PD Maliq janë të konfirmuar 350 persona që do marrin pjesë në protestë dhe nisja do të behet me makina private.
Nga dega e PD-së Pogradec kemi afro 400 protestues ku organizimi është bërë me makina të vogla. Dhe nga PD Kolonjë janë rreth 30 persona të cilët po ashtu janë organizuar me mjete të vogla.
Janë afro 1600 protestues të qarkut jug-lindor të cilët do i bashkohen protestës së sotme të thirrur nga kryetari i Partisë Demokratike Sali Berisha.
Kurse sipas informacioneve të fundit nga Vlora do të nisen rreth 200 automjete, të cilat janë regjistruar në zyrat e PD-së, Dega Vlorë. Ata do të nisen drejt Tiranës rreth orës 12:00.
