Partia Demokratike dhe partitë opozitare do të zbresin nesër në shesh në të dytën protestë kombëtarë të organizuar prej tyre që nga kthimi i Sali Berishës në krye të selisë blu.
Qytetarët anembanë Shqipërisë të shtyrë nga rritja e çmimeve, kriza ekonomike, pagat e ulëta dhe çdo faktor tjetër ekonomik dhe social në regres që prej 2013, pritet që të mblidhen në protestën kombëtare në kryeqytet ku do të kërkohet largimi i kryeministrit Edi Rama.
Mësohet se Partia Demokratike ka njoftuar Policinë e Shtetit për zhvillimin e një proteste që do të zgjasë 2 orë, por mbetet për t’u parë se çfarë mund ta pasojë tubimin që është parashikuar të nisë në orën 16:00.
Ndërkohë, që Partia Demokratike ka zgjedhur që të mos japë shumë detaje lidhur me organizmin e tubimit, kryeministri Edi Rama duket se si çdo herë kur rivalët e tij e sfidojnë me popullin në shesh ka zgjedhur të largohet nga Tirana.
Këtë herë ndryshe nga të tjerat kur endet në Shqipëri, Rama do të fluturojë jashtë vendit. Sot dhe nesër kreu i qeverisë do të jetë në Paris ku do të marrë pjesë në punimet e Samitit të Paqes.
