Deputeti i PD-së, Dashnor Sula, ka ngritur shqetësimin e tij sa i takon statistikave nga Eurostat, të cilat vlerësojnë se mosha mesatare e vendit po rritet.
Në një postim në FB, Sula shkruan se Shqipëria po plaket dhe se kjo është pasojë direkte e politikave të qeverisë, duke iu referuar eksodit dhe faktit që rinia ka frikë të krijojë familje nga mospërballimi i kostove të jetesës.
“Në pension duhet të dalë qeveria jo Shqipëria! Shqipëria po plaket. Këtë alarm e ka ngritur EUROSTAT ku sipas të cilës grupmosha deri në 14-vjeç është ulur me 3.1% për periudhën 2014 -2021, duke kryesuar kështu listën e tridhjetë e shtatë vendeve për të cilat janë publikuar të dhënat (Kosova mungon). Nga 19.6% që ishte përqindja e popullsisë deri në 14 vjeç në vitin 2014, ka zbritur në 16.5% në fund të 2021-t. Kjo tregon se popullsia Shqiptare po plaket. Të rinjtë dhe të rejat kanë frik të krijojnë familje sepse nuk përballojnë kostot. Për shkak të diferencës së madhe mes pagave reale në shqipëri dhe çmimeve në treg të rinjtë dhe të rejat kanë frikë që të ndërtojnë familje. Një çift i ri duhet të punojë gjithë jetën për të siguruar një shtëpi. Por arsyet ekonomike nuk janë të vetmet. Një çift i ri ka frikë të krijojë familje sepse kjo qeveri që në mandatin e parë nisi kanabizimin e të gjithë shqipërisë. Kjo qeveri që kur erdhi, nisi të ulte financimet për arsimin publik dhe sot është në kushtet ku ka ngritur pedagogët në protestë. E ardhmja me këtë qeveri jo vetëm që nuk është e sigurtë por është e minuar. Në portin kryesor të shqipërisë po shkarkohen më shumë konteiner me kokainë sesa me mallra.Plakja e popullsisë shqiptare është edhe më e shpejtë nëse llogarisim eksodin galopant të viteve të fundit të të rinjve dhe të rejave që nuk kthehen në shqipëri”, shruan Sula.
Sula bëri thirrje për pjesëmarrje në protestë pasi tha se nuk duhet ta lëmë Shqipërinë të dalë në pension, por se duhet të pensionojmë qeverinë.
“Me një qeveri të korruptuar, ekonomi të dobët, me arsimin përtok, me rendin publik thuajse zero nuk ka të ardhme. Këtë po e reflektojnë qytetarët. Unë kam një kërkesë: që të mos lemë Shqipërinë të dalë në pension, duhet të nxjerrim qeverinë që është shkaktarja e të gjithave atyre më sipër, në pension. Ne duhet të ngrihemi të gjithë bashkë në protestë e ti tregojmë se koha e kësaj qeverie ka mbaruar. Duhet të bëj valixhet gati sepse nuk i përfaqëson”, përfundon Sula.