Mediat greke kanë zbardhur në detaje ngjarjen e mbrëmjes së djeshme në aeroportin “Eleftherios Venizelos” të Athinës, ku me kërkesë të CIA-s u ndaluan të fluturonin dy avionë në drejtim të Nju Jorkut, pasi dyshohej se do të realizoheshin akte terroriste.
Sipas Protothema, 35-vjeçari i arrestuar është shtetas turk dhe ai ishte përpjekur të merrte një vizë për të udhëtuar në Nju Jork si refugjat.
CIA kishte informacione se ai do të kryente një akt terrorist në fluturimet që niseshin nga aeroporti “Eleftherios Venizelos” i Athinës drejt Nju Jorkut në datat 10 dhe 11 nëntor me linjën “Emirates”.
35-vjeçari kishte tentuar të merrte një vizë për të udhëtuar në Nju Jork si refugjat dhe besohet se është anëtar i një organizate terroriste.
Të njëjtat burime bëjnë të ditur se 35-vjeçari kishte hyrë në Greqi nga Turqia dy-tre vite më parë dhe banonte në Athinë me status azilanti. Ai kishte aplikuar për azil dhe autoritetet greke i kishin dhënë një leje qëndrimi të përkohshme deri në vitin 2025.
Kujtohet se pas informacioneve të CIA-s, të vlerësuara si serioze se në avionët që niseshin nga Athina ndodhej një pasagjer i dyshimtë, njëri prej tyre është bllokuar përpara se të ngrihej në fluturim dhe i dyti është kthyer në Athinë pas nisjes.
Sipas të njëjtave informacione, burri nuk ishte në asnjë nga avionët.
Ndërkohë, thrrilleri në avionin e “Emirates” u përcoll mëngjesin e së premtes nga pasagjeri Yiannis Spyridakis, i cili foli për ANT1.
“Kishte një përditësim nga stafi që po ktheheshim në Athinë. Në fillim menduam se e kishim dëgjuar gabim njoftimin, më pas stafi na informoi se vërtet do të ktheheshim. Ata nuk e thanë arsyen në fillim. Na thanë se avioni duhet thjesht të kthehej në Athinë. Pas përpjekjeve tona, ata thanë se kishte një problem me hapësirën ajrore franceze”, zbuloi pasagjeri.
“Në një moment e kuptuam se diçka nuk ishte në rregull. Imagjinoni që edhe interneti për të cilin disa prej nesh kishin paguar gjatë fluturimit thjesht u ndërpre. Ne nuk kishim as akses në internet në avion”, shtoi ai.
Duke përshkruar atë që ndodhi kur avioni u ul në “El. Venizelos”, Spyridakis tha se “u njoftua se do të zbresin pasagjerët, vetëm ata që kanë hipur nga Athina, sepse avioni kishte ardhur nga Dubai në fillim”.
“Kishte makina sigurie të aeroportit, kishte disa makina policie, por kalimi ynë nga avioni në autobus ishte shumë i qetë. Pasaportat, sendet personale dhe bagazhet tona u kontrolluan përsëri. Kemi pasur një pamje të qartë të incidentit kur zbritëm, hapëm celularët dhe përmes rrjeteve sociale kuptuam se për çfarë bëhej fjalë”, përfundoi pasagjeri i fluturimet të “Emirates”.
