Në mbrojtjen që i bëri projektit të portit të Durrësit dhe Buxhetit për vitin 2023 ditën e djeshme në Parlament, kryeministri Edi Rama përveç akuzave në drejtim të opozitës, sulmoi drejtpërdrejtë edhe Prokurorinë e Tiranës.
Për Ramën, organi i akuzës ka funksionuar si “sportel për të rritur pazarin dhe për të mbyllur kallëzimet që Drejtoria e Tatimeve i ka depozituar”. Kryeministri gjithashtu përmendi se disa letra kanë përfunduar te “Partia e Lekut” duke ju referuar Partisë së Lirisë, drejtuar nga Ilir Mta.
“Na ka ngecur sharra në gozhdë në Prokurorinë e famshme të Tiranës, e cila prej shumë vitesh ka funksionuar si sportel për të rritur pazarin, duke mbyllur çështjet që drejtoritë tona të të ardhurave t’i çojnë për ndjekje penale dhe duke marrë para nga ata, të cilët duhet të ndiqen penalisht dhe duke çuar pastaj letrat tek bedelat e PDPL-së për të bërë gjithë ato zullume me letra të marra nga prokuroria, letra të cilat në prokurori i kanë çuar drejtoritë tona të të ardhurave, si puna e atyre rasteve të famshme të TVSH-ve fiktive me të vdekur e me të paralizuar që ishin të gjitha raste të denoncuara nga Drejtoria jonë e Tatimeve për të ndjekur penalisht ata të cilët i kishin bërë, dhe ata jo vetëm nuk u ndoqën penalisht, por letrat iu dhanë ‘’Partisë së Lekut’’ dhe “Partia e Lekut” fillojë të bëjë gjithë atë që bëri, duke i hedhur sa më shumë hi e sa më shumë baltë syve shqiptarëve”, deklaroi Rama.
Akuzave të kryeministri i është përgjigjur sot deputetja e Partisë së Lirisë, Monika Kryemadhi, e cila tha se dosjen e evazionit fiskal e ka pasur në dorë bashkëshorti-prokuror i një deputeteje të PS-së.
“Prokurori që ka qenë përgjegjës, burri i një deputeteje socialiste. Ka hetuar Thanas Canin etj. Nuk besoj që burri i deputetes i ka dhënë Monikës dosjen e evazionit fiskal. Presioni që ka ushtruar Rama ndaj prokurorisë për të mos vepruar për të hetuar për inceneratorin e Tiranës”, deklaroi Kryemadhi.
Sipas saj, Rama po ushtron presion ndaj organit të akuzës në një kohë kur duhet të bëjë transparencë për milionat që vidhen çdo ditë me aferën e inceneratorëve.
“Kryeministri thotë që është një investim prej 128 milionë eurosh për menaxhimin e mbetjeve. Unë jam shumë e gatshme që kryeministri të na bëjë transparencë për mënyrën sesi bëhet procesi i përpunimit të mbetjeve. Padia jonë kryesore për Tiranën. Qytetarëve të Tiranës i grabitën 15 milionë dollarë. Nuk është e kollajshme të thërrasësh Erion Veliajn dhe Edi Ramën por më e pakta është të bllokojë pagesat për inceneratorin e Tiranës. Nuk mendoj që është hetim kompleks. Është një hetim shumë i thjeshtë i inceneratorit të Tiranës. Pika e lidhjes së përbashkët është Pivot 4. Argumentim politik, komenti si çështjeje komplekse. Çështja e inceneratorit të Tiranës ka vështirësinë e saj. Nuk është si rasti i Elbasanit dhe Fierit për shkak se pagesat kishin mbaruar. Ndërsa për inceneratorin e Tiranës është një koncesion që paguhet për 30 vjet. Dhe nëse sekuestrohet nga prokuroria, qeveria e Tiranës nuk do të paguajë më 10 milionë euro por do të paguajë më pak”, shtoi Kryemadhi.
