Policia britanike është vënë në ndjekje të gjurmëve të një trafikanti njerëzish, i cili organizoi një grup të krimit të organizuar që tentoi kontrabandimin e më shumë se 100 emigrantëve në drejtim të Britanisë.
36-vjeçari Barzan Kamal Majeed, i cili njihet me nofkën ‘Akrepi’ është në arrati, pavarësisht se ai mori një dënim me 10 vite burg për kontrabandë njerëzish në mungesë të tij në një gjykatë në Bruges muajin e kaluar.
Për Majeed, i cili është me origjinë nga Notinghami drejtësia belge akordoi gjithashtu një gjobë prej 968,000 Euro.
36-vjeçari tentoi të kontrabandonte emigrantë në Britaninë e Madhe me gomone dhe kamionë, ndërsa pas tij janë vënë agjentët e Agjencisë Kombëtare të Krimit, por edhe autoritetet belge, holandeze dhe franceze.
Hetimi i tyre shqyrtoi 31 përpjekjet që grupet bënë për të kontrabanduar emigrantë në ishull midis korrikut 2018 dhe nëntorit 2019 dhe identifikuan ‘Akrepin’ si udhëheqësin e rrjetit.
Krimineli u zhvendos në Britaninë e Madhe në vitin 2013, duke jetuar në Nottingham, ku ka ende lidhje, ndërsa në vitin 2015 ai u deportua në rajonin e Kurdistanit të Irakut Verior.
