Kreu i Partisë së Lirisë, Ilir Meta ka komentuar për herë të parë dorëheqjen e Grida Dumës dhe Alfred Rushaj të cilët gjatë 24 orët e fundit kanë lënë mandatin e deputetit.
Gjatë një deklarate për mediat, Meta tha se “parlamenti i 25 prillit është i deformuar” , ndërsa theksoi se aksioni opozitar tashmë është përqendruar tek protesta kombëtare e 12 nëntorit.
“Çdo akt individual është i respektuar, nuk më takon mua të jap komente. Në çdo rast duhet të respektohen. Ajo që mund të them me bindje është që parlamenti i 25 prillit është i deformuar, sigurisht që ishte më i përparuar se ai i ‘kërpëratave’ që Shqipëria kishte për dy vite rresht. Por është shumë larg të qenit një parlament demokrat, përfaqësues i shqiptarëve. Tani vëmendja është 12 nëntori, protesta e madhe kombëtare. Qëndrimi ynë si Parti e Lirisë është pjesëmarrje sa më aktive në parlament dhe në çdo institucion, por ne e dimë që fuqia e Opozitës nuk mund të jetë në atë parlament”, tha Meta.
