Ursula von der Leyen i ka bërë thirrje pjesës veriore të globit të ndjekë shembullin e BE-së në financimin e luftës kundër ndryshimeve të klimës në pjesën jugore. Edhe pse bota e zhvilluar nuk e ka përmbushur zotimin për të dhënë 100 miliardë dollarë për klimën, presidentja e Komisionit Evropian tha se kontinenti i vjetër po ecën përpara.
“Pjesa jugore e globit ka më shumë burime. Le të bëhemi bashkë. Prandaj BE po nënshkruan partneritet me Egjiptin, Namibinë dhe Kazakistanin për hidrogjenin. Prandaj po mbështesim partnerë si Vietnami dhe Afrika e Jugut për të asgjësuar karbonin. Duhet të arrijmë objektivin e Parisit dhe Evropa është në kursin e duhur. Ne do t’i reduktojmë emetimet e gazrave me 55% brenda 2030-s”, tha Ursula von der Leyen, presidente e Komisionit Evropian.
Ekspertët e klimës dhe aktivistët janë të shqetësuar se bisedimet nuk do të adresojnë si duhet çështjen kryesore, e njohur si “humbjet dhe dëmet”. Kjo i referohet impaktit shkatërrues të motit ekstrem, që mund të shkatërrojë infrastrukturën fizike të një vendi.
“Vendet në zhvillim dhe komunitetet në vijën e parë janë ftuar të financojnë për të adresuar humbjet dhe dëmet për mbi 30 vjet, që përpara arritjes së Marrëveshjes së Klimës në Paris. Dhe më në fund jemi në këtë samit, ku palët mund të zgjedhin nëse të veprojnë për t’u dhënë zgjidhje humbjeve dhe dëmeve që kanë prekur komunitetet, ose t’i vënë shkelmin marrëveshjes dhe t’i vonojnë më tej ndërhyrjet”, u shpreh Rachel Simon, eksperte për klimën.
Temperaturat gjatë tetorit në Evropë ishin më të ngrohtat në histori, duke prekur 2 gradë Celsius më shumë se periudha e referencës në vitet 1991-2020.
