Kreu i Partisë Demokratike Sali Berisha, gjatë mbledhjes që po zhvillon këtë mesditë grupi parlamentar i PD në selinë blu, akuzoi qeverinë dhe Edi Ramën se vjedhin buxhetin e shtetit dhe se po rrënojnë ekonominë e vendit.
Teksa fliste për buxhetin e vitit 2023, Berisha tha se në 7 vite sipas KLSH-së janë vjedhur nga Edi Rama dhe ministrat e tij 8.2 miliardë euro.
“Për çdo vend debati për buxhetin është më i rëndësishme, por për Shqipërinë kjo nuk ndodh, së pari se buxheti është i vjedhur para se të votohet, gjithçka në zëra është falsitet, pasi siç kanë faktuar zhvillimet dhe KLSH, ai vidhet në masën më të madhe të tij.
Ju jeni dëshmitarë sesi në 7 vite sipas KLSH janë vjedhur nga Rama dhe ministrat e tij 8.2 mld euro. Ju garantoj se ky buxhet është një fatkeqësi e te tjetër, se prapa çdo zëri të madh qëndron një vjedhje e madhe.
Këta nuk kanë të ndalur, por vjedhja me buxhetin është vjedhje e dyfishtë.
Edi Rama po shkatërron si një fuqi e të keqes të ardhmen e këtij kombi së pari me largimin masiv nga Shqipëria e të rinjve shqiptarë së dyti me borxhin e tmerrshëm që u vendos qytetarëve shqiptarë. Pas 20 vitesh një fëmijë që lind në Shqipëri do të jetë borxhli me 21 mijë euro. Në këtë kontekst ky buxhet shënon një rritje tjetër të Borxhit Publik, shënon një hap të rëndësishëm në falimentimin e plotë ekonomik të Shqipërisë. Ju jeni dëshmitarë se aferat e Edi Ramës nga sipërmarrjet personale te vendimet personale kundër sipërmarrësve të tjerë së shpejti tejkalojnë 1 miliard euro, personale pasi borxhet e arbitrazhit tejkalojnë gjysëm miliardi euro. Procese të shumta janë në arbitrazh të garantuar me humbje 100% për mos të thënë se shiten vetë.” , tha Berisha.
