Në prag të zgjedhjeve lokale të 14 majit, kryeministri Edi Rama ka rikonfirmuar besimin te kryebashkiaku i Shijakut, Elton Arbana duke kërkuar hapur edhe njëherë votën për të.
Teksa ishte duke folur për projektin e “Rindërtimit” në këtë zonë, Rama e vlerësoi Arbanën për punën në terren, duke thënë: “Rol të rëndësishëm ka pasur edhe kryetari juaj i bashkisë që ka qenë zgjedhja e duhur. Nga të gjithë kryetarët e bashkive të zonave të tërmetit ky u ka qëndruar më pranë njerëzve gjatë kësaj periudhe”.
“Dua t’i them kryetarit të bashkisë që sot e duam sërish kryetar bashkie, është kryebashkiaku i tërmetit. Sa mirë që i ka zgjidhur konfliktet mes njerëzve, dihet tashmë, çështje pronash, çështje katesh e të gjitha”, shtoi Rama.
Karriera e Arbanës ka njohur çuditërisht një ngjitje falë besimit që Rama i dha atij pavarësisht se emri i kryebashkiakut u shfaq në përgjimet e publikuara nga gazeta gjermane “Bild”.
Në një prej përgjimeve të viti 2017, Elton Arbana flet në telefon me vëllain e “Niçes së Shijakut”, Astrit Avdylajn, ku diskutojnë për shitblerje votash dhe favore, ndërsa shfaqin një miqësi të ngushtë.
Arbana i premton të akuzuarit për trafik ndërkombëtar të lëndeve narkotike dhe krijim të grupit të strukturuar kriminal, Astrit Avdylaj që do të ndërhynte në anulimin e një gjobe nga IKMT.
Ndër të tjera në përgjim Astrit Avdylaj i thotë Elton Arbanës: “Po s’ka qenë aty Vangjushi se unë isha dje me Edin. Merre vlla. Thuaj o b**h*im thuaj se ke shku atje duke i vënë gjoba në fermë. Dëgjo tani se nuk është Vangjushi këtu”.
