Kryetari i Partisë Demokratike, Sali Berisha ka shprehur mbështetje të hapur ndaj çdo vendimi që merr sindikata e pedagogëve që kërkon rritje page për këtë kategori.
Nëpërmjet një deklarate për mediat nga selia blu, Berisha tha se nuk mund të pranojë një pedagog në Shqipëri të paguhet sa gjysma e pedagogëve në Kosovë.
“Në çdo hap të saj ajo dhe cilado organizatë do të ketë mbështetjen totale të PD-së. Theksoj se ne nuk mund të pajtohemi kurrë që një pedagog në universitetin e Tiranës të marrë gjysmën e rrogës nga një pedagogu në universitetin e Prishtinës. Kjo ndodh sepse qeveria e Kosovës nuk vjedh nga qytetarët”, tha Berisha.
Kujtojmë që ditën e sotme pedagogët u rikthyen në auditore, pasi u tërhoqën nga vendimi për të bojkotuar procesin mësimor. Kreu i sindikatës, Aleksandër Kovaçi tha se kjo është e përkohshme, ndërsa paralajmëroi se protestat do të vazhdojnë.
Ditën e nesërme pedagogët kanë njoftuar protestën e katërt kombëtare në kampusin qendror të Universitetit Politeknik. Pedagogët kërkojnë rritjen me 50% të pagave dhe nuk pranojnë vendimin e qeverisë për rritje me 7% nga buxheti i shtetit dhe 8% nga ai i universiteteve.
