Politikat financiare të qeverisë, përfshirë këtu edhe draftin e propozuar për realizimin e amnistisë fiskale por edhe paketat për përballimin e krizës energjetike dhe inflacionin në rritje janë kritikuar në mënyrë të vazhdueshme nga Konfindustria në takimet e kryeministri Rama me Dhomat e Tregtisë.
Kreu i Konfindustria Gjergj Buxhuku rreth dy muaj më parë u përplas në një prej takimeve me Ramën, duke e vendosur para përgjegjësisë për goditjen e biznesit të vogël dhe abonentëve familjarë me aplikimin e fashës 800 kWh.
Ndërkohë, sot Konfindustria me një njoftim për mediat ka shprehur qëndrimin e saj kundër Paketës Fiskale për vitin 2023.
“Buxheti dhe Paketa Fiskale 2023, të paraqitura nga ekzekutivi, tregojnë mungesë të qartë të strategjisë të përballimit të krizës energjetike të shpallur zyrtarisht”, thuhet në njoftim.
Konfindustria vlerëson, se është e papranueshme, që në Paketën Fiskale 2023 nuk është parashikuar asnjë ulje e ngarkesës fiskale për produkte si karburantet dhe gazi i lëngshëm me qëllim zbutjen e pasojave të krizës energjetike.
Njoftimi për shtyp:
Konfindustria vlerëson, se Buxheti dhe Paketa Fiskale 2023, të paraqitura nga ekzekutivi, tregojnë mungesë të qartë të strategjisë të përballimit të krizës energjitike të shpallur zyrtarisht. Është e pakuptueshme, që nuk ka asnjë parashikim buxhetor prej pak milionë $USD për vënien në punë të TEC-it të Vlorës pas 11 vitesh, ndërkohë që parashikohen me qindra milionë euro shpenzim për të njëjtin sasi të prodhimit të energjisë nga anijet e sjella nga Bangladeshi me ndikim shkatërrues mjedisor.
Konfindustria vlerëson, se është e papranueshme, që në Paketën Fiskale 2023 nuk është parashikuar asnjë ulje e ngarkesës fiskale për produkte si karburantet dhe gazi i lëngshëm me qëllim zbutjen e pasojave të krizës energjetike. Konfindustria ka kërkuar në pezullimin e “taksës së qarkullimit” dhe “taksës së mjedisit” me qëllim uljen e çmimeve të paktën në nivelin e shteteve të rajonit. Gjithashtu, kërkohet heqja e plotë e taksave për “gazin e lëngshëm”.
Konfindustria mbështet politikën financiare të sapofilluar për familjet dhe bizneset për vetë prodhimin e energjisë elektrike nga panelet diellore. Shuma e shpallur prej vetëm 2 milionë euro është mjaft e ulët dhe duhet parashikuar e shumëfishuar në Buxhetin 2023.
Konfindustria vlerëson, se është e papranueshme mosparashikimi në Paketën Fiskale dhe Buxhetin 2023 të uljes së barrës fiskale si dhe financimit të veshjeve termoizoluese për ndërtesat publike dhe private, njësitë industriale, pajisjeve termike për rritjen e eficiencës energjetike, etj.
Gjergj Buxhuku
Administrator i Përgjithshëm
