Një ngjarje e pazakontë ka ndodhur në Tiranë, ku një grua bashkë me dy djemtë e saj ka qëndruar e ngujuar për 6 vite në banesë për shkak të prirjeve radikaliste të kryefamiljarit.
Këtë të dielë, shtetasi Xherxh (Gjergj) Laçi, 52 vjeç, u arrestua nga policia pas denoncimit për kërcënimin, dhunimin dhe ngujimin e bashkëshortes dhe dy djemve 15 dhe 17 vjeç, të cilët nuk i lejonte të dilnin nga shtëpia.
Mesohet se kanë qenë familjarët e gruas që kanë denoncuar në polici 52-vjeçarin duke treguar atë që po ndodhte.
Kur policia ka mbërritur në banesën e familjes Laçi, mësohet se gruaja iu ka kërkuar djemve të largohen pas, e terrorizuar për atë që mund të ndodhte. Më pas ka qenë ajo vetë që iu ka treguar armët e përdorura nga bashkëshorti dhe dhunën e pësuar për vite me radhë.
Siç shihet nga fotot e publikuara nga policia, 52-vjeçari përdorte thikat për t’i kërcënuar, teksa i dhunonte gruan dhe djemtë me thupra e rrip për të mos i lejuar të dilnin jashtë.
Ata jetonin në një shtëpi pa energji elektrike, pa ujë të pijshëm dhe pa televizor në kushte të mjerueshme, teksa kryefamiljari që sipas policisë ishte me prirje radikale i kishte izoluar dhe nga drita e diellit, duke i mbyllur dritaret për të mos parë jashtë.
Blutë e kryeqytetit bëjnë me dije se 52-vjeçari ka qenë i dënuar më parë për armëmbajtje pa leje.
Ndërsa fqinjët e familjes thane Xherxhi Laçi vuante nga çrregullime të shëndetit mendor, dhe nuk i linte të dilnin familjarët, ndërsa shtojnë se familjen etij i mbanin fqinjët dhe të afërmit me ushqime.
