Pesë gra u gjetën të vrara në një shtet qendror të Meksikës, në kohën kur vendi është përfshirë nga një valë e paprecedentë dhune ndaj grave.
Trupat u gjetën mëngjesin e djeshëm në qytetin Cuautla, jo shumë larg kryeqytetit. Sipas Uriel Carmona, prokurori i përgjithshëm i Morelos, i cili foli për mediat, vrasjet dukej se ishin një pastrim hesapesh midis bandave të krimit të organizuar.
Tre trupa u gjetën në qese plastike, së bashku me një mesazh nga një drejtues bande, i cili tha se vrasjet ishin hakmarrje ndaj një bande tjetër. Dy trupat e tjerë, njëri prej të cilëve i përkiste një gruaje transgjinore, mbanin shenja që linin pak dyshime se vrasjet ishin vepër e anëtarëve të bandës.
Lajmi i zymtë erdhi teksa autoritetet në Morelos dhe në kryeqytet tashmë po hetojnë se çfarë ndodhi saktësisht me 27-vjeçaren Ariadna Fernanda Lopez, e cila u pa e gjallë për herë të fundit të dielën në Ciudad de Mexico përpara se të gjendej e vdekur në një autostradë në Morelos të hënën.
Sipas Carmona, autopsia ka treguar se e reja ka vdekur nga helmimi me alkool. Pyetjet që nuk kanë marrë ende përgjigje janë saktësisht se si dhe pse trupi i saj u gjet në Morelos.
Mesatarisht, dhjetë gra vriten në ditë në Meksikë, me qytetin Morelos që regjistroi shkallën e tretë më të lartë të vrasjeve të grave midis të gjitha shteteve meksikane nga janari deri në shtator të këtij viti, sipas të dhënave zyrtare.
Senati meksikan në fillim të kësaj jave miratoi masat që synojnë të trajtojnë plagën e dhunës ndaj grave.
Në veçanti, parashikojnë dënime më të rënda, deri në 22 vjet burg për sulme me acid ndaj grave dhe 5 vjet burg për ngacmim seksual. Megjithatë, projektligji mbetet për t’u miratuar nga Kuvendi.
