Politologu Ilir Kalemaj foli në edicionin e lajmeve në MCN TV mbi protestën opozitare të 12 nëntorit, duke theksuar se është e rëndësishme që në shesh të dalin jo vetëm anëtarët dhe simpatizantët e PD dhe PL, por edhe qytetarë të shtresës gri.
Kalemaj vë në dukje se opozita duhet të artikulojë qartë qëllimet e protestës.
Sipas politologut, protesta nuk nxitet nga Kremlini apo një vend tjetër, duke i konsideruar deklaratat e kryeministrit si fantapolitikë dhe qëndrime që bëhen me qëllim shkurajimin e protestuesve.
“Natyrisht, kjo protestë që ishte paralajmëruar qysh në fillim të shtatorit, duket se po vjen me shirat e vjeshtës. Nuk besoj se do jetë më gurë, molotov dhe dhunë. Se sa do arrijë z.Berisha të mbledhë në shesh, jo vetëm anëtarësinë dhe militantët e PD-së dhe PL, por edhe qytetarët e Tiranës, pjesën gri, mbetet për t’u parë. Protestat në Shqipëri kanë vuajtur nga sindroma e strategjisë dalëse. Çadër bëri Rama, çadër bëri edhe Basha. Problemi është cila është strategjia. Synohet të bjerë qeveria? Nuk ra qeveria Nano. Cili është qëllimi? Zgjedhjet e parakohshme? Duhet artikuluar si kërkesë. Është qeveria teknike? Të mbahet elektorati i karikuar, duhet qartësuar sepse njerëzit sot s’janë ata të 92-shit apo 2005-ës, një pjesë e atyre që janë të pakënaqur po e shohin zgjidhjen jashtë Shqipërisë”, u shpreh.
Lidhur me deklaratat e Ramës që protesta opozitare sponsorizohet nga Kremlini, Kalemaj tha:
“Në mënyre absolute jo! S’është nxitje nga jashtë. Se di me kë konsultohet Rama për këto teza, apo kë mendon se dëmton. Lobingu pro rus është fantapolitikë, parapolitikë. Nuk i shërbejnë problemeve që ka Shqipëria. Protestuesit janë shqiptarë, ata kanë probleme me çmimet e konsumit, është rritur çmimi i energjisë, fasha, po protestojnë shoqatat e biznesit, Dhoma Amerikane e Tregtisë, prodhuesit ë birrës, janë duke protestuar pedagogët, studentët, fermerët, ka grupe të ndryshme shoqërore të pakënaqur. Sa do e arrijë opozita ta kanalizojë këtë pakënaqësi në një shtrat opozitar, është bast i opozitës”.
Politologu u shpreh se çdo lidhje mes Iranit, Rusisë, Koresë së Veriut apo Kinës me opozitën shqiptare është fantapolitikë, spekulime që nuk qëndrojnë. Kalemaj e konsideroi po ashtu një spekulim të Ramës pretendimin se Berisha është shpallur “non grata” për shkak të lidhjeve me Rusinë.
“Është prapë spekulim nga z.Rama. Nëse i referohemi burimeve të DASH, në asnjë vend s’është përmendur lidhja e tij me Rusinë. Përkundrazi ka qenë rasti i z.Basha. Berisha s’ka qenë në atë kohë kryetar i PD, dhe s’ka asnjë lidhej të dukshme apo të padukshme, që mund të spekulojmë. Z. Rama po mundohet të bëjë diversion për të shkurajuar protestuesit opozitarë”.
Kalemaj tha se është dramatik fakti që biznesi është duke falimentuar, ndërkohë që paratë shkojnë për oligarkë, shpenzime operative apo luksi.
“Biznesi është i pakënaqur, Dhoma Tregtare janë në unison. Që biznesi është i pakënaqur dhe është duke falimentuar, kjo është dramatike. Duke falimentuar ata njerëz do ketë më pak konsumatorë, ata do ikin dhe ky vend do shkretohet. Të flasësh për biznesin është punëdhënësi më i madh në botë. Biznesi është alfa dhe omega e ekonomisë së tregut. Pedagogët protestojnë për të drejtat e tyre, për rrogat që janë margjinale. Nga qeveria varët fondi i kërkimit shkencor, dhe i kërkim zhvillimit, buxheti, ku sot jepet vetëm 2,3 për qind. Ku shkojnë paratë, shkojnë për oligarkë, rrugë të nisura dhe të pa bitsuara, për shpenzime operative dhe shpenzime luksi. Deklaratat e Berishës janë për të rritur entuziazmin, s’duhen marrë si kopertinë, të gjithë e dinë që PD po vuan probleme të brendshme, që PD në vetvete s’është e bashkuar, por z. Berisha përfaqëson sot që ne flasim shumicën e PD dhe shumicën e opozitës shqiptare. A do fitojë shumicën e bashkive, mbetet për t’u parë”.
