Një 29-vjeçar ka përfunduar në prangat e policisë së Lezhës, pasi rezultonte i shpallur në kërkim kombëtar për veprën penale të “Shtrëngimi me anë të kanosjes apo dhunës për dhënien e pasurisë”.
I arrestuari është Fatjon Kordhaku, i cili pasi u ndalua iu dorëzua Policisë së Tiranës për kryerjen e veprimeve të mëtejshme.
Njoftimi i policisë:
Strukturat operacionale të DVP Lezhë dhe të Komisariatit të Policisë Lezhë, si rezultat i veprimeve të koordinuara policore dhe shkëmbimit të informacionit me shërbimet e DVP Tiranë, me qëllim kapjen e personave të shpallur në kërkim dhe vendosjen e tyre para përgjegjësisë ligjore, si dhe mbështetur nga inteligjenca informative, kanë lokalizuar dhe kapur në Lezhë, shtetasin e shpallur në kërkim kombëtar: F. K. (P)., 29 vjeç, banues në Balldre, Lezhë, pasi Gjykata e Rrethit Gjyqësor Tiranë, në vitin 2021, ka caktuar ndaj tij masën e sigurisë “Arrest në burg”, për veprën penale “Shtrëngimi me anë të kanosjes apo dhunës për dhënien e pasurisë”.
I ndaluari iu dorëzua shërbimeve të Drejtorisë Vendore të Policisë Tiranë, për veprime të mëtejshme procedurale”, thuhet në njoftimin e policisë.
